Indarkeria sexista salatzeko egun nagusia zen atzokoa, Emakumeenganako Indarkeriaren Kontrako Nazioarteko Eguna. Eta asmo horrekin, dozenaka herritar bildu ziren Plaza Berrin. Salatu zuten, makineria oso bat dagoela indarkeria sexistaren atzean: «estetika kanonak, lan banaketa, maitasun erromantikoaren ideologia, erasoak... Zapalkuntza patriarkalak bizirauteko ezinbestekoa duen indarkeria sexistaren makineriaren parte dira».
Aldarrikatu zuten, gehiegi direla ematen diren kasuak, Hernanin bertan: «Udalaren datuen arabera, 11 dira aurten indarkeria sexista jasan eta Udalarekin harremanetan jarri direnak. Eta ezin ahaztu Txaro Roman hernaniarraren erahilketa».
«Urteak daramatzagu jostorratzak zorrozten»
Sistema heteropatriarkalak itsu nahi dituela salatu zuten atzoko kontzentrazioan: «baina gurekin jai dute! Urteak daramatzagu jostorratzak zorrozten, eta hori da gure helburua: makineria lehertzea!».
«Kolektiboki erasoei erantzuna ematen jarraituko dugu, salatzen eta konfrontatzen. Indarkeriarik gabeko herri bat nahi dugulako; aske egingo gaituzten harreman eredu batzuk nahi ditugulako».