Kontsumitzaileen eta ekoizleen arteko harremana zuzena izatea, eta ekoizleek merezi duten irabaziak jasotzea bultzatu nahi du Nafarroako Gobernuak orain gutxi onartu berri duen Dekretu Foral honen bitartez. Abenduan jarriko da martxan.
Kalitatezko produktuak, baserritik kontsumitzaileen eskuetara
Goizuetan badira 2-3 baserri, abeltzaintzatik eta nekazaritzatik bizi direnak; tartean, Domiña eta Maingenea baserriak. Juan Jose Elizalde abeltzaina da horietako bat, eta berria ona dela azaldu du: «lege hau garrantzitsua da, eta aukera berriak irekitzen ditu baserritik bizi nahi dugunontzat».
«Aukera berriak irekitzen ditu baserritik bizi nahi dugunontzat».
Aukera berri horietako bat ekoturismoa izan daitekeela uste du Elizaldek. Izan ere, kontsumitzaileek etxean, modu naturalean egindako kalitatezko produktuak eskatzen dituzte, eta askotan, ekoizpen prozesua ezagutzea ere gustatzen zaie. «Zuzeneko salmentarekin aukera izanen dugu eroslearekin zuzenean aritzeko, eta nahi izanez gero, baserria erakusteko, edo nola lan egiten dugun erakusteko».
Mota guztietako produktuak
Goizuetan abeltzainak eta baratzeko lanetan ibiltzen diren nekazariak izanen dira lege honen onurak jasoko dituztenak.
Hala ere, beste hamaika produkturen ekoizleei ere eraginen die lege berriak. Besteak beste, zukuak, mermeladak, fruta eta barazkien kontserbak, sagardoa, ardoa, likoreak, esnekiak, eztia eta bertatik eratorritakoak, infusioak egiteko espeziak, oliba olioa edota arrautza freskoak ekoizten dituztenei.