Ostegunean aurkeztu zuten, Lasarte-Oriako Villa Mirentxun, Innoforo programa. Aurreneko saioa ere egin zuten. Helburua da eskualdeko garapena bultzatzea; eragile mota desberdinen elkarlanari esker, jarduera ekonomiko konkretuak sortzea, horrekin lanpostuak sortzeko.
Elkarlana, giltza
Aurkezpenean izan ziren Nerea Yurrebaso, Andoaingo Tokiko Garapeneko arduraduna; Luis Intxauspe, Hernaniko alkatea; Pedro Iturbe, Gipuzkoako Foru Aldundiko Lurralde Garapeneko zuzendaria; eta Carlos Isoird eta Iñigo Urkidi, BIB S.Coop enpresako kideak eta programaren dinamizatzaileak.
Bertan, elkarlanaren garrantzia azpimarratu zuten: «arlo publiko eta pribatuaren arteko elkarlana beharrezkoa da tokiko garapena bultzatzeko. Beterri da garapen agentzia ez daukan eskualde bakarra».
40 eragile inguru, aurreneko saioan
Aurkezpena bukatuta, aurreneko saioa egin zuten ostegunean bertan, Villa Mirentxun bildutako 40 eragile inguruk. Tartean zen Andoni Gartzia Astigarragako alkatea.
Dinamizatzaileek azaldutakoaren arabera, «Innofororen helburua ez da ikerketa bat egitea, baizik eta eragile desberdinen arteko elkarlana sustatzea, jarduera ekonomikoa bultzatu eta lanpostuak sortzeko». Helburuak dira, eskualdeko sektore estrategikoak eta gorako bidean daudenak identifikatzea, tokiko garapen koherenterako estrategia definitzea, aukera-esparruak identifikatzea, aukera eta ekimenak zehaztu eta martxan jartzea, eta tokiko garapenerako politika bideragarriak identifikatzea.
Saioak, 15 egunean behin
Osteguneko saioan sei udalerrietako politikari eta enpresetako eragileek eskualdeko jarduera sozioekonomikoak identifikatu zituzten.
Hamabost egunean behin egingo dituzte bi orduko saioak, 17:30etan hasita, aldiro, udalerri batean. Saioetan edonork hartu dezake parte. Hala ere, saio bakoitzean gai zehatzak landuko dituzte, eta horrekin lotuta eragileak deituko dituzte. Informazio gehiago, udaletxean.