Irabazi edo irabazi. Beste aukerarik ez dauka Endika Barrenetxea hernaniarrak gaur, Binakako Txapelketan. Zeberio IIrekin, ligaxkako azken partidua jokatuko du, Etxeberria IV eta Etxeberria IIIren kontra. Ezin interesgarriagoa da partidua: irabazten duen bikoteak, semifinaletarako azken txartela lortuko du. Zita arratsaldeko 16:00etan, Galarretan.
8 punturekin daude Zeberio eta Barrenetxea; 6rekin Etxeberriatarrak. Baina tantoek ez diote ezertarako balioko gaur, 40ra iristen ez denari: «dena jokatuko dugu azken partidu honetan», dio Barrenetxeak.
Zeberio eta Barrenetxea, «konfiantza haundiarekin»
Konfiantza haundiarekin iritsiko dira Zeberio eta Barrenetxea, partidu erabakigarrira: «aurreko astekoak, galduta ere, konfiantza eman zigun. Oso zail geneukanean, gure jokoa egiten hasi ginen, eta buelta eman genion ia». Gainera, goraka doa bikotea, oso juxtu hasi ondoren: «gero eta hobeto konpenetratzen ari gara, bakoitzak bere lekua hartzen».
Irabazteko aukera asko ikusten ditu Barrenetxeak, baina badaki ez daukatela fidatzerik: «dena jokatzen dugu partidu bakarrean, eta final bat bezalakoa izango da. Presio haundia dago, beraz, eta egoera horretan, edozer gerta daiteke».
Ondoren, Uterga-Endikak eta Ezkurra-Ionek, ligaxkako bigarren postua jokatuko dute.