Hernanin bizi diren 66 familiek elkarrekin bazkalduko dute bihar, Bizilagunak ekimenaren bueltan. Bertako familia bat, eta atzerriko bat elkartuko dira, bietako baten etxean, bazkaldu eta elkar ezagutzeko gogoz.
Bizilagunak ekimena SOS Arrazakeriak antolatu du beste urtebetez, eta Hernanin, Amherrek babestu du. Asmoa da, bertako eta atzerriko familiak bazkari baten bueltan elkartzea, elkar ezagutu, aurreiritziak puskatu eta harremanak sendotzeko.
Inoizko ediziorik jendetsuena
Antolatzaileak pozik dira ekimenak edizio berri honetan izan duen harrerarekin, 66 familien zifra, orain arteko onena baita, diferentzia haundiarekin. 60 familiak dira Hernanikoak: 30 bertan jaioak dira, eta, beste 30ak etorkinak. Azken hauen artean daude Kolonbia, Ekuador, Senegal, Nigeria, Sahara, Dominikar Errepublika, Nikaragua, Honduras eta Uzbekistanen jaioak.
Asko, berriak
Autoktonoak diren familien artean, izena eman dutenen erdiak, 15, berriak dira. Eta etorkinen kasuan berriz, ia guztiak dira berriak: 30etik 25.
Antolatzaileek azaldu dutenez, azken hauen kasuan, erabaki dute azken urteetan Hernanira etorri direnak lehenestea: «azken bi urteetan Hernanira etorri diren familiak lehenetsi ditugu. Etorkinen bertaratzea da helburua, eta ekimenari esker, aukera izango dute, familiarekin batera, bizitzeko aukeratu duten herria hobeto ezagutzeko».
Asmoa da bertako eta atzerriko familiak elkar ezagutzea, aurreiritzia haustea eta harremanak sendotzea
Gazteak ere animatu dira
Aurtengo beste berrikuntzetako bat da, 21 eta 27 urte bitarteko gazteak ere animatu direla. Izan ere, Bizilagunak ekimenean ez dute soilik familiek parte hartzen, baita lagun koadrilek ere: «gazteek bosnako koadriletan eman dute izena, eta beste gazte edo familiekin elkartuko dira».
Plana, elkar ezagutzea
Eguerdiko 14:00ak inguruan elkartuko dira 66 familiak, bata edo bestearen etxean; 27 bazkari egingo dira guztira. Harrera egingo duen familiak prestatuko du otordua, eta gonbidatuak ere, eramango du zerbait. Elkarrekin harremanetan jartzeko, dinamizatzaile bat izango dute, eta honen lana izango da elkartze hori ahalik eta baldintza onenetan ematea. Hau da: «aurrez, batak bestearen ohiturak ezagutzea, bisitariak hartzailearen etxera eramatea, aurkezpenak egitea, hizkuntza zailtasunak badaude itzultzaile lanak egitea, etabar...».
66 familiek eman dute izena aurten, eta 27 bazkaritan elkartuko dira
Jaialdia, datorren larunbatean
Bizilagunak ekimenean parte hartu duten familia, laguntzaile eta kide guztiak jaialdi baten bueltan elkartuko dira, datorren larunbatean.
Jaialdia Donostiako Victoria Eugenia antzokian izango da, arratsaldeko 17:00etan, eta gerturatu nahi duen guztiarentzat izango dituzte ateak zabalik.