Euskera ariko du Hernanin, bazterrik bazter, azaroaren 29tik abenduaren 3ra, Euskeraren Egunera. Baina, arrapaladan dena bota eta desagertzen den ekaitza baino, egunero egunero bustiko duen xirimiria izatea nahi dute. Euskerari eskainitako bost egun izango dira, baina helburua da aurrerantzean Hernani egunero euskeraz bizitzea.
Aste osoko egitaraua prestatu dute, herriko eragile desberdinek: AEK euskaltegia, Udal Euskaltegia, Dobera Euskara Elkartea, BanaizBagara, Berriaren Lagunak, Hernaniko Udala, eta herriko ikastetxeek; Elizatxo, Langile, Urumea, Inmakulada eta Hernani BHI.
Bost egunez, euskera indartzea helburu
Azaroaren 29an egingo dute hasiera ekitaldia, Txantxangorri elkartearen aurrean. Eguerdiko 12:30etan izango da, euskera indartzeko asteari hasiera emango dion saioa. Hurrengo egunean, igandean, kale antzerkia izango da Plaza Berrin, 13:00etatik aurrera.
Mintzodromoak hartuko du txanda astelehenean. Bi saio egingo dituzte, Atsegindegin, ordubetekoak: goizean, 10:00etatik 11:00etara; eta arratsaldean, 18:00etatik 19:00etara. Parte hartzeko, aurrez eman behar da izena: 943 33 18 96 edo euskaltegi@hernani.net.
Kaxkoa euskalduntzeko saiakera, abenduaren 2an
Abenduaren 2an izango da ekitaldi nagusia. Kaxkoa euskalduntzeko saiakera egingo dute, eta horretarako, denen ekarpena eskatu dute: egiten diren erosketa, jolas, elkarrizketa... guztiak, euskeraz egin ditzatela. Bakoitzak, ahal duen neurrian, euskeraz egin dezala, 24 orduz... eta aurrerantzean.
Eta Euskeraren Egunean, irakurraldiak izango dira herriko lau tabernatan: Goiz Eguzki, Uru, Kixkal eta Txema. Arratsaldeko 18:30etan hasita, bertsoak, prentsa artikuluak, ipuinak... irakurriko dituzte.