Astigarraga Lantzeneko administrazio kontseiluan pleguak onartu ziren Zarkumendegiko partzela bat alokairuan jartzeko eta bertan obra hondakinen birziklapen planta bat jartzeko. H1!ek kontra bozkatu zuen eta arrazoiak azaldu ditu: «Alde batetik, gehiegizkoa iruditzen zaigu 12 urteko alokairua, inguru horren etorkizuna baldintzatzen baitu. Bestetik, jarduera horrek leku asko behar du eta ingurunea zikintzen du. Plegu honek ez du ezer aipatzen ze azpiegitura beharko diren horrelako jarduera bat martxan jartzeko; hala nola: sarrera, bertara iristeko bidea, ura, argia… Bilduk dioen bezala, mota honetako lehenengo planta litzateke Gipuzkoan, eta beldur gara lurralde osoko obra hondakinak ez ote diren Astigarragara etorriko. Eta horrek kamioien joan-etorria ere ekarriko du».
Bilduk esandakoaren kontra, ez duela Gipuzkoa berdeagoa izatea ekarriko dio: «Bilduk esaten duenean, “jarduera honekin argi geratzen dela berriz ingurumenaren eta hondakinen kudeaketa egoki eta jasangarri baten alde egiten duela, herri eta lurralde berdeagoa eta jasangarriagoa lortzeko”, barregurea sartzen zaigu, negar ez egiteagatik, obra honek ekarri ditzakeen arazoak kontuan hartuta. Arazo horiek, argi azaldu dugun bezala, ez dute lurralde berdeago bat irudikatzen».
Hormigoneraren alde
Bilduren gobernu taldeak, «txapuza berri honekin» aurreko proiektua kritikatzeko aprobetxatzen duela gaineratu du H1!ek: «Proiektu haren oinarria zen, partzela saltzea (horrela Astigarraga Lantzenek Udalarekin daukan zorra ordainduko zen) eta hormigonera bat jartzea. Eta berriz autobonboa eginez, halaxe dio Bilduk: “Iraganeko ereduak alboratzeko garaia da (hormigonera) eta alde batera utzi nahi dugu baita ere mugarik gabe eraikitzea eta adreilua eta hormigoia sustatzea”».
Hipokresiatzat jo du H1!ek: «Hori, Urumea Berrin 200 etxebizitza eraikitzen ari den gobernu talde batek dio. Eta orain Ikastola haundituko dutela kontuan hartuta, hormigoia baztertuko dute? Eta Bilduko hauek egurrezko txaboletan bizi al dira ba? Guk hormigoneraren alde egiten jarraitzen dugu jarduera garbiagoa eta jasangarriagoa delako birziklatze planta hori baino. Astigarraga, obra hondakinen hiriburu bihurtuko dute».