Andoni Gartzia alkateak atzo prentsaurrean azaldu zuen partehartze ordenantza bat sortu nahi duela Udalak, herritarrekin batera. Hala azaldu zuen: «Partehartzearen alorrean, aurrerapauso haundia emateko asmoa dugu. Partehartze ordenantza bat sortzeko asmoa dugu, herritarrak Udal jardueraren erdigunean jarri nahi ditugulako. Partehartze prozesu ugari egin ditugu: Udaleko bilerak auzoetara eraman ditugu, herritarrek iritzia emateko web orria sortu dugu, inbertsioetako zati bat nora bideratu herritarrek erabaki dute... Orain, pauso bat gehiago emateko garaia da, eta pauso hori da partehartze ordenantza».
Zertarako ordenantza?
Bi arrazoi eman zituen alkateak ordenantza sortzeko: «Batetik, herritarrek Udalarekin duten hartu-emana bideratuko duen tresna izateko, eta bestetik, Udala zenbait gauzetan behartua egon dadin herritarren partehartzearen esparruan».
Honako Udal jardunak arautuko lituzke: Udalak derrigorrez herritarren eskura jarri behar duen informazioa (epaiak, aurrekontuak...); aurrekontuak osatzerakoan herritarren partehartzea bermatu eta sustatuko duen prozedura osatzea; herritarrei Pleno eta batzordeetako edukiak hurbiltzea; herritarren eskaera, ekarpen eta kexak bideratzeko prozedurak erraztea; kontsultak egiteko prozedura sortzea...
Lau bilera
Ordenantza hau, herritarrekin batera egin nahi du Udalak eta lau bilera egingo dituzte. Lehenengoa astelehenean izango da. Gainerakoak: abenduak 1, 10 eta 15. Guztiak, 19:00etan izango dira udaletxeko Pleno aretoan. Herritarrei dei egin zien alkateak parte hartzeko: «Sakondu dezagun demokrazia zuzen eta partehartzailean eta ez gaitezen mugatu 4 urtero botoa ematera».
2015eko aurrekontuei begira, partehartze prozesua berriz martxan jarriko dutela aurreratu zuen.