Hiru egun besterik ez dira geratzen azaroak 22rako. Indarkeria sexistaren aurkako matazak ekimenaren egun potoloa izango da eta atzo prentsaurrekoa eman zuten ekimenaren arduradunek. Bufanda erraldoi bat osatu dute, munduko txoko desberdinetatik bidalitako indarkeria sexistaren kontrako mezuekin, eta horixe jarriko dute udaletxeko balkoian, larunbatean. Egun osoan zehar, ekitaldi ugari ere izango dira, 10:00etatik aurrera. Andoni Gartzia alkateak halaxe azaldu zuen: «Emakumeen kontrako indarkeria mundu osoan zabalduta dagoen gaitza da eta Astigarragan, ekimen honen bitartez, gure ekarpena egin nahi diogu borroka honi». Astigarraga eta inguruko herritarrei larunbatean parte hartzeko gonbitea luzatu zien eta baita azaroak 25ean udaletxearen aurrean egingo den kontzentraziora joateko ere.
«Sekulakoa izan da erantzuna»
Isabel Otero berdintasun zinegotziak emozionatuta hitz egin zuen: «Ekimena pasa den urte amaieran abiatu genuen. Lan haundiko hilabeteak izan dira, bufanda egiten eta proiektua zabaltzen. Aurreikuspenen arabera, 500 metroko bufanda zabaltzea lortuko dugu larunbatean. Eta horrez gain, 535 metro bidali dituzte Kordobatik. Kilometro pasatxoko bufanda osatuko dugu. Pasada bat da. Ez genuen hau lortzerik espero. Ekimen honen berri ematean, inork ez du ezezkorik esan. Sekulakoa izan da, herri txiki batetik abiatutako ekimenak horrelako erantzuna izatea. Oso pozik gaude, Astigarragan, genero indarkeriaren aurkako aldarrikapena bistaratu eta zabaldu dugulako!». Eskerrak eman zizkien ekimenarekin bat egin duten guztiei: «Bufanda zatia bidali duzuen guztiei, Harituz elkarteko eta Haurralde fundazioko kideei, Emakunderi eta Astigarragako kolektibo eta elkarteei. Eskerrik asko zuen laguntza eta eskuzabaltasunagatik!». Euskal Herriko bufandarik luzeena izango da behintzat.
Bufanda zatiak lortu dituzte Euskal Herriko lurralde guztietatik, espainiar estatuko komunitate guztietatik eta munduko 16 herrialdetatik: Ingalaterra, Frantzia, Polonia, Mexiko, Portugal, Errumania, Belgika, Errusia, Austria, Tunisia, Suedia... Eta oraindik jasotzen ari dira. Atzo bertan Holandatik jaso zuten.
Larunbatean ez dela proiektua bukatzen gaineratu zuen Oterok: «Gure aldarrikapena ozen zabaldu eta gero, beste pauso bat emango dugu eta bufanda zati horiek desegin eta mantetan bihurtuko ditugu behar gehien dutenen artean banatzeko».
Bihar eta ostiralean ere bai
Bihar, murala pintatuko dute 19:30etan, Joseba Barandiaran plazan eta ostiralean, hitzaldia izango da: Ni plazerra naiz. 17:00etan, Gaztelekuan.