Ikaragarrizko lana egin zuen atzokoan Hernanik; jokalari profesionalek osatzen dute Santanderko Independiente taldea, eta hala ere, partidu nahiko parekatua jokatu zuten.
Zaletuek emozio eta tentsio haundiarekin bizi izan zuten jokaldi bakoitza. Bereziki, bukaera aldera, jokoa nahasi eta epaileak entsegu bat baliogabetu zuenean. 27-38 galdu zuen Hernanik.
Hasieran, berdinduta
Hasieran 10 puntuko aldea atera zuen Santanderrek. Genuak tartea txikitu zuen zigor kolpe batekin, eta berdinketa etorri zen gero, Oier Garmendiaren entseguari eta Genuaren transformazioari esker. Atsedenaldiaren aurretik, ordea, 10-16, bisitariek.
Bukaeran, tarjeta gorriak
Atsedenalditik bueltan tartea zabaldu zuen Independientek: 10-23. Genuak zigor kolpea egin zuen segidan, eta Independientek beste entsegu batekin erantzun; 13-28.
58garren minutuan zigor entsegua adierazi zuen epaileak: 18-28; eta Genuak borobildu: 20-28. Gero, nahasmena: entsegu bana, txartel gorriak David Pelaez eta jokalari santandertar bati, eta inork ikusi ez duen avant baten aitzakian epaileak baliogabetutako Hernaniren entsegu bat.