Hernani, Astigarraga, Urnieta, Lasarte-Oria, Andoain eta Usurbilgo herriek 2010ean sinatutako hitzarmenaren emaitzetako bat da KOOPeratzen proiektua. Hitzarmenaren helburua da ekimen soziala eta berdea bultzatzea.
Kasu honetan, KOOPeratzen formakuntza zentro bat izango da, enpresa berriak sortzeko ideiak dituztenei zuzendua, beti ere, ideia horren ardatz badira ekimen soziala, ekonomia soziala edota ekintzailetza kooperatiboa. «Izaera honetako aurreneko formazio zentroa da hau Euskal Herrian», azaldu zuten ostiraleko aurkezpenean.
Metodologia berria
Ikastaroaren helburua izaera kooperatibodun enpresak sortzea denez, horri bideratutako formakuntza metodologia berria sortu da. Hiru ardatz izango ditu: ideiak ikuspegi kooperatibotik garatzeko formazio espezifikoa; jarraipen indibidualizatua; eta elkarrekin kooperatzeko sarea sortzea enpresa hauen artean.
Izen-ematea, bihartik
Bihar hasi eta azaroaren 28ra arte eman ahal izango da izena, Lanbiden, 6 udalerrietako udaletxeetan, edo webgunean: kooperatzen.net.
Bereziki, langabezian daudenak animatu nahi izan dituzte abenduan hasi eta apirilean bukatuko den ikastaroan izena ematera: «buruan daukaten ideia aurrera ateratzeko aukera da». Informazio gehiago, 943 30 42 21 telefonoan edo ekinean@andoain.org helbidera idatzita.