Ostegunean aurkeztu zuen PSE-EE alderdiak 2015eko hauteskundeetarako Hernaniko alkatetzarako hautagaia: Ricardo Crespo, Zientzia Politikoak ikasia, eta PSE-EE alderdian bederatzi urte daramazkiena. Zinegotzia ere izana da, Lazkaon eta Usurbilen. Pablo Peñacoba, Hernaniko PSE-EEko idazkari nagusiaren esanetan, «Hernaniko udaletxea oso ondo ezagutzen du, eta ez daukagu zalantzarik oso hautagai ona izango dela».
Denis Itxaso: «Atez Atekoa elkartu egin behar gaituen gaia da».
Denis Itxaso, Foru Aldundirako sozialisten hautagaia ere izan zen aurkezpen ekitaldian: «Hernanin gerta daitekeen onena da Ricardo Crespo alkate izatea. Aldundiaren apostua zein den ere argi erakusten du, gazteen alde egiten baitugu. Gertukoa da bera. Ingurugiroarekin lotutako gaiekin beti interesa erakutsi duena. Hernani bezalako herri batean, Atez Atekoa ez da egokia. Hainbeste biztanle eta dituen kale motak kontuan hartuta, eztabaida sortu zen. Berez, elkartu egin behar gaituen gaia da».
Ricardo Crespo: «Jasangarria den Hernani nahi dut».
«Politika bere onera ekartzeko gardentasuna eta herritarren parte hartzea behar dira»
Ricardo Crespo hautagaiak azaldu zuen: «politika bere onera ekarri behar da, eta horretarako, gardentasuna eta herritarren parte hartzea behar dira».
Alkate izatera iritsiz gero zein konpromiso beteko dituen azaldu zuen. Batetik, hauteskunde programako proposamenen %75a beteko duela azaldu zuen. «Errealista naiz. Badaude proposamenak udaletxeen eskura egoten ez direnak». Beste konpromisoen artean aipatu zituen, baita ere: aurrekontu partehartzaileetan sakontzekoa, udal gastu guztien inguruko informazioa herritarren eskura jartzekoa, Atez Atekoaren inguruko galdeketa egitekoa, eta trafiko bideak berraztertu eta aldatzekoa.
Lan taldeak osatuko dituela ere azaldu zuen: «denon artean erabaki eta erabakitakoa gauzatuko dugu».
Azken batean, «ekonomia, ingurugiroa eta gizartearen ikuspegitik Hernani jasangarri bat» nahi duela argitu zuen. «Gardentasuna, parte-hartzea, energia eta esperantza, gauzak hobetzekoarena, eskaintzen dizkiet hernaniarrei».