Udalak jakinarazi duenez, Arrobitxulo eta Urumea Berriko zenbait bizilagun harremanetan jarri dira Udalarekin Tranbia ibilbideko lanek etxeetan eragindako bibrazioengatik larrituta. Egoera aztertu dute eta teknikari eta arkitektoek Udalari baieztatu diotenez, eraikin eta pertsonentzako ez dago inolako arriskurik. «Bibrazio horiek gogaikarriak eta desatseginak direla ezin da ukatu eta horregatik bizilagunei barkamena eskatu nahi diegu. Hala ere, beharrezkoak dira obra ondo bukatzeko. Bibrazioak, materiala konpaktatzeko makinak eragiten ditu», azaldu dute Udaletik. Astebete gehiago beharko dute konpaktazioa bukatzeko eta bitartean neurri batzuk hartuko dituzte. Ordutegia zaindu, besteak beste.