Asteburuan musikarekin gozatzeko aukerarik ez da faltako. Hasteko, bihar 19:30etan Musika Bandak joko du, udaletxeko arkupeetan. Igandean, berriz, kamara kontzertu berezi bat antolatu da, 12:00etan Milagrosan. Ondoren, 12:30etan, ‘Hernani’ Musika Eskolako txistulariek joko dute, udaletxeko arkupeetan.
Santa Zeziliaren omenezko konzertua Bandak, bihar
Astebete aurreratu eta Santa Zeziliaren omenezko kontzertua antolatu du Musika Bandak biharko, 19:30etan udaletxeko arkupeetan.
Bost obra interpretatuko dituzte denera, Roberto Pachecoren zuzendaritzapean: Donosti Zaharra pasodoblea, Guillermo Tell opera obertura; El Bateo zarzuela; The man with the golden arm jazz bilduma; eta Huapango Mexikoko musikala.
Poloniako independentzia eguna gogoan, igandean
Igandean beste kontzertu bat izango da, 12:00etan Milagrosan. Kamara kontzertua izango da, Elzbieta Podolak flautista, Alek Mikolajczyk kontrabajo-jolea eta Javier Perez de Azpeitia pianistaren eskutik.
Poloniak independentzia lortu zuela 96 urte bete ziren asteartean, eta horren harira antolatu da emanaldi berezi hau. Izan ere, Euskal Herrian bizi diren poloniarren elkarteak, Arrano Zuriak, urteurrena ospatzeko bazkaria egingo du Santa Barbara elkartean.
Txistulariak ere, igandean
Beste kontzertu bat ere izango da igandean: ‘Hernani’ Musika Eskolako txistulariek joko dute, eguerdiko 12:30etan udaletxeko arkupeetan, Iñaki Egurenen zuzendaritzapean.
Ikasturtean zehar antolatzen dituzten hiru-lau kontzertuetan aurrenekoa izango da hau, eta txistularien ohiko errepertorioaz gain, garai ezberdinetako euskal kantuak joko dituzte. Besteak beste: Mendi aldera biribilketa, Otzoal obra, fandango eta arin-arina, Galeriano zortzikoa, Xarmangarria baltsa, Maiteaz galdezka kantua, La Dominguera jota, Polskie piosenki kantu poloniarren bilduma, Ilargia kantua eta Hasierako bilduma.