Hernaniko Hezkuntza Plataforma sortu berri da LOMCE Sutara plataformatik abiatuta. Helburua da Hernaniko hezkuntza gaiak lantzea. «Bertan parte hartzen dugunok garbi dugu hezkuntza ez dela bakarrik eskolara mugatzen, herriak ere asko duela esateko gure herrirako nahi dugun eta behar dugun hezkuntzaren inguruan».
Hilero, saioak
Plataformako kide direnek azaldu dute hainbat lan egingo dituztela. Horren adibide dira, batetik, hileko bigarren ostegunero antolatuko dituzten Hezkuntza Eskola saioak. Bertan hainbat egitasmo eta proiekturen berri emango dute. Lehenengo saioa ostegun honetan egingo da, 20:00etan Biterin. Sortzen elkarteak martxan duen Ikasle euskaldun eleaniztunak sortzen proiektuaren berri emango dute bertan; Euskararen Kontseiluaren proposamenean oinarritzen da, eta euskera ikastetxeko eremutik haratago zabaltzeko beharra adierazten du.
Bestalde, lanean jarraituko dute: «hezkuntzan izan dugun lege atzerakoiaren kontrako borrokan jarraituko dugu; baita herrian sortzen diren kezkei jarraipena egiten ere».