Gabriel Zelaiako eraikinean du egoitza Buruntzaldeako Garapen Agentziak. Ostegunean egin zuten aurkezpena, eta Buruntzaldeako PSE-EE alderdiak prentsa oharra bidali du, horren harira.
Salatu dute, Bilduk bere bulegoan hartu duela erabakia, eta alde batekoa izan dela, hau da, ez dutela Udaletan adostu: «eskualdean adostasunik izan gabe hartu du Bilduk erabakia. Komunikabideetan ikusi dugu Luis Intxauspe, esanez, Garapen Agentzia Gabriel Zelaian egongo dela, eta erabakia guztion artean hartu dela. ‘Guztiok’ hitza erabiltzen duenean, nori buruz ari da Intxauspe? Erabakia ez da eskualdeko udaletxeetan hartu, Bilduren bulegoetan baizik».
Luis Intxauspek bozeramaile ardura ere hartu duela dio PSE-EEk, eta ez dakitela non erabaki den hori: «komunikabideetan behin eta berriz ikusi liteke Garapen Agentziaren inguruko berriak ematen. Erabaki hori ere, ez da inon adostu».
«Oraindik ez dira Estatutuak onartu»
Alderdi sozialistak salatu du, Buruntzaldeako Udalek oraindik ez dituztela Agentziaren inguruko Estatutuak onartu: «eta beraz, gehiengo bat egon daiteke, agentzia beste nonbait egotea nahi duena. Bide batez, gogoratu nahi dugu Bilduk agentzia Orona Ideok Galarretan duen egoitzan jarri nahi zuela. Zer gertatu da? Orona konturatu egin al da txiringito bat dela? Ez parte hartzea erabaki al du?».