Hernaniko gazteriaren egoera zein den jakin nahi du Udalak. Diagnosia egitea da asmoa, eta horretarako partaidetza prozesua jarri du martxan. Aztikerren laguntzarekin, hainbat saio egiten ari dira herrian. Gaurkoa bigarrena izango da, eta gazteen arteko harremana izango dute aztergai. Zinkoenean elkartzeko deia egin dute, 18:00etan.
Hernaniko zenbat gazterekin duzu harremana?
Udalak azaldu duenez, Hernanin 15 eta 29 urte bitarteko 2.674 gazte bizi dira. Gaurko saioarekin aztertu nahi dute, gazteen arteko harremanak sortzen duen kezka. Kezka hori 19 urteko emakume batek esandakoan ikus liteke: «herri kuadrillista da Hernani. Kuadrilletan separatuta bizi gara, ez gara elkartzen». Hainbat galderei erantzuna ematen saiatuko dira gaur: «zenbat gazterekin duzu harremana? Nolakoa da gazteen arteko harremana? Zein onura izan dezake bestelako harreman eredu bat garatzeak? Eta hernanirentzat?».