Betor jardunaldien barruan, hitzaldia antolatu dute bihar Hernaniko Udalak eta Eusko Jaurlaritzak elkarlanean. Betor jardunaldien helburua da, interneten euskeraz lan egiten duten enpresen berri izatea: «asmoa da, interneteko ekintzaile euskaldunen esperientziak ezagutzera ematea, gure artean ezagunagoak izan daitezen».
Hitzaldia Galarretan izango da, Orona fundazioak bertan duen egoitzan, arratsaldeko 18:30etatik 19:30etara.
Wattio enpresa, gonbidatua
Biharko solasaldia Wattio enpresako kideekin izango da. Wattio enpresak domotika sistema adimentsuak sortzen ditu, energia aurrezten laguntzeko. Interneten murgilduta dagoen enpresa da, eta erabiltzeko errazak diren aparatuak egiten dituzte; esaterako, etxeko termostatoa mugikorretik kontrolatzeko tresnak.
Bezeroarengana modu askotara iritsi izan dira, eta horren berri eman nahi dute bihar: «hainbat modu erabili izan dituzte, esaterako, brikolaje saltoki haundiak, crowfunding kanpainak... eta orain gutxi AEBetan saltzen hasiak dira, Amazonen bidez. Guztia kontatuko dute bihar».
Plaza mugatuak daude
Hitzaldira joan nahi dutenek aurrez izena ematea komeni da. Izan ere, plazak mugatuak dira. Izena emateko edo informazio gehiagorako: www.euskadinnova.net, info@bicberrilan.com edo 943 00 09 99.