Zarkumendegiko partzela batean, obra eta eraispen (derribo) hondakinak kudeatzeko planta bat jarriko da. Udalak alokairuan jarriko du partzela hori eta Astigarraga Lantzeneko Administrazio Kontseiluak urriaren 17an onartu zituen alokairuko pleguak. Kontratua, 180.000 euro gehi BEZan baloratu da eta 12 urteko alokairu kontratua izango da. Adjudikatzen den momentuan ordaindu beharko da kopuru guztia. Operazio honekin, Udalak adierazi du, Astigarraga Lantzenek Udalarekin daukan zorraren zati bat ordainduko duela.
Gipuzkoako lehenengo planta
Zarkumendegiko planta horretan, obrako hondakinak jaso eta gestionatuko dira. «Helburua da, hondakin horiek birziklatzea. Gipuzkoan mota honetako lehenengo planta izango da. Gaur egun, zabortegietan pilatzen diren hondakin hauei beste irtenbide jasangarriago bat emateko aukera paregabea da. Honekin, argi geratzen da berriz Astigarragak ingurumenarekin eta hondakinen kudeaketa jasangarri eta egokiarekin duen konpromisoa, Astigarraga eta Gipuzkoa berdeagoak eta jasangarriagoak nahi ditugulako», azaldu du Gobernu Taldeak.
Hormigonerarik ez
Plegu hauekin, aurreko legegintzaldian Zarkumendegiko beste partzela baterako zeuden planak «zokoratu» direla nabarmendu dute: «Pasa den legegintzaldian, partzela hura saltzea aurreikusten zen, bertan hormigonera bat jartzeko. Udaleko idazkari-kontuhartzaileak salmenta pleguen aurkako txostena aurkeztu zuen. Iraganeko ereduak alboratzeko garaia dela uste dugu». Planta berria, Udaleko idazkari eta zerbitzu juridikoen oniritziarekin egin dutela gaineratu dute.
Jarduerak sortu ditzakeen eraginen aurrean, kontrol zorrotzak aplikatuko dituztela argi utzi dute. Eta gaineratu: «Alokairu kontratua izanik, herriarentzat jarduera hain mesedeko ez balitz, partzela hori berreskuratzeko aukera izango du Udalak. 12 urteak pasata, berriz erabaki ahalko da zer egin. Aurreko legegintzaldiko plangintzarekin, salmenta burututa, ez zegoen horrelako aukerarik. Beraz, ez gaude betirako “kondena” baten aurrean». Enplegua sortzeko ere baliagarria izango dela azpimarratu dute.
Eragin ekonomikoa
Operazio honek izango duen eragin ekonomikoaren garrantzia azaltzeko, Astigarraga Lantzenen bilakaera ezagutu behar dela nabarmendu dute: «Astigarraga Lantzenek milioietako galerak izan ditu, EAJ eta H1!eko Udal Gobernuek bultzatutako ereduaren ondorioz. Galeren ibilbidea eten zen Gobernu aldaketari esker, 2012an. Besteak beste, Astigarraga Lantzen erreskatatzea erabaki genuen, astigartar guztien kontura, 579.686,19 euroko ekarpena eginez. Erreskaterik gabe, enpresak hondoa jo behar zuen, ordura arte Udalak, eta ondorioz astigartar guztiok, jarritako dirua eta ondasunak galtzeko arriskuarekin. Plegu hauekin, zorraren zati bat ordainduko da. Udalaren helburua da, ahalik eta azkarren guztia errekuperatzea. Dena kobratutakoan, Astigarraga Lantzen desagerraraziko da, gutxi batzuen intereserako sortu ziren “txiringitoekin” bukatu behar delako».