Astigarragan, partehartze prozesu bat jarri du martxan Udalak aniztasunaren eta jatorri desberdineko pertsonen arteko elkarbizitza nola landu zehazteko. Plangintza egin nahi du, herritarren partaidetzarekin eta ekarpenekin, eta hiru bilera edo lan saio antolatu ditu. Gaur izango da lehenengoa, kultur etxeko areto nagusian (18:00-20:00). Halaxe azaldu dute: «Azken urteotan Astigarragatik kanpo jaiotako jende asko etorri da gure artera bizitzera, dela inguruko herrietatik, dela bestelako herrialde batzuetatik. Aberastasun horretaz jabetuta, kultur aniztasuna gizarteratzeko, plangintza bat osatu nahi dugu, herritarrekin elkarlanean».
Gaur, aniztasunaren diagnostikoa landuko dute, besteak beste.
Talde bat sortu
Prozesuaren bidez, Udalak herriaren kultur aniztasunaz jabetu nahi ditu herritarrak, eta elkarren berri izateko eta elkar ezagutzeko topaleku bat sortu nahi du. «Aurrera begira gaia nola landu behar den ere definitu nahi du prozesuak, zein ekintza egingo diren zehaztu, beharrak eta erronkak identifikatu, eta ahal dela talde iraunkor bat sortu, gaia lantzen jarraitzeko», azaldu dute.
Partehartze prozesua, Elhuyar Aholkularitzak gidatuko du. Hurrengo lan saioak ere asteazkenetan izango dira: azaroaren 12an eta 26an.