2015eko Udal Aurrekontuan zein proposamen sartu erabakitzeko bilerak egiten ari dira, auzoz auzo. Aste honetan egingo dira azken hiru saioak: gaur, Sorgintxulon; asteazkenean, Haur Eskolan; eta ostegunean, Biterin; denak, 19:00etan.
Bozkatzeko aukera zabalik dago azaroaren 7ra arte: etxean jasotako galdetegiak Biterin, kiroldegian edo udaletxean entregatu daitezke, edo botoa internet bidez eman, www.hernani.net webgunean.
Azaroaren 19an azalduko da zein proposamen izan diren bozkatuenak, eta beraz, zein sartuko diren 2015eko aurrekontuetan.
Urumea ikastola, kanpainan
Guztira, 33 proposamenen artean aukeratu daiteke, eta 10 aukeratu behar dira.
Urumea ikastolan, Gay Murreko patioa estaltzearen aldeko kanpaina egiten ari dira, eta bozkatzeko mahaiak jarri dituzte. Hala azaldu du zuzendaritzak: «Gay Mur da patio estalirik ez duen herriko eskola bakarra». Proposamen hau egiteak aurrekontu osoa hartuko luke; 500.000 euroak.
Boto gehien jasotzen dituzten proposamenak sartuko dira datorren urteko aurrekontuetan, baldintza hauek betez gero: 500.000€ horietatik gutxienez 300.000€ inbertsioetarako izango dira; 200.000€ gehienez gastu orokorretarako eta hauen artean gehienez 50.000€ urtero errepikatzeko izaera duten proposamenetara bideratzeko.