Aspertzeko tarterik ez zegoen atzo, Txantxillako festetako egitarauan. Goizeko 09:00etan diana joz hasi zen jai giroa auzoan, eta 09:30etan, Santa Barbarara igoera lasterketa hasi zen. Raul Gomez lasartearra izan zen azkarrena, 00:22:40 denborarekin, eta nesketan, Mara Olazabal hernaniarra, 00:30:34 denborarekin. Hernaniar azkarrena, berriz, Anartz Artola izan zen, 00:24:33 eginda. Ermitan kanpaia jo zutenek ere jaso zituzten sariak. Eta saririk espero ez zuenak ere jaso zuen bat, berezia: Ibai Alba, auzotarra eta kirolaria, karrera antolatzen aritua, omendu zuten.
Txupinazoan, berriz, Karmen Etxeberria omendu zuten, Laubidieta etxean jaioa. Maialen Lujanbiok bertsoa kantatu zion, eta dantzariek, Agurra dantzatu zioten.
Arratsaldean festak aurrera egin zuen dozenaka ekitaldirekin. Tartean, arima bihurriak atera ziren kalejiran, maxkuriekin eta zezenekin jendea dantzan jartzera.
Eguna bukatzeko, saiheski jan ederra egin zuten.