Momentu zailenean, aurkari gogorrena izango du Hernanik. El Salvadorren Pepe Rojo zelaian ariko dira hirukoloreak gaur, 17:30etan. Ohorezko Mailako bigarren sailkatua da El Salvador, eta jokatutako bost partiduak irabazi ditu. Moralez gainezka iritsiko dira, beraz, are gehiago Faduran Getxori irabazi ondoren, bonus eta guzti. Valladolidekoek iazko taldea dute oinarrian, eta fitxaketa garrantzitsuak egin dituzte: Dani Marron horpokatzailea eta Sam Katz joko zabaltzailea, esaterako. Oso partidu zaila izango du Hernanik, baina puntuak pilatzeko asmoarekin joango dira. Emakumezkoen Euskal Ligan, bestalde, bigarren partidua jokatuko du Hernanik. Estreinakoa izango dute Landaren, eta partidu garrantzitsua, taldea non egon daitekeen ikusteko: La Unica talde nafarraren kontra ariko dira, aurreko urteetan hirukoloreen antzeko maila erakutsi duena. Bigarren posturako arerio bezala ikusten dute hernaniarrek, Getxorekin lehiatzea ia ezinezkoa dela onartuta.