Hernaniko Udalak, Aztikerrekin batean, datorren urteko Gazte Politikarako lan ildoak zehazteko parte hartze prozesua jarri du martxan. Asmoa da gazteekin eztabaidatzea, dituzten beharren inguruan.
Gaur, prozesu horretako lau saioetako lehenengoa egingo da, arratsaldeko 18:00etan, Plazan. Espazioaren erabileraren inguruan ariko dira. Non ibiltzen dira gazteak? Lokaletan? Tabernetan? Kalean? Gaztetxean? Zergatik erabiltzen dituzte espazio batzuk eta ez besteak? Zer eskaintzen dute leku horiek? Eta zer falta zaie?
Beste hiru saio, beste hiru gai lantzeko
Duela bi aste aurkeztu zuten prozesua gazteen aurrean, eta gaurkoa izango da egingo diren lau saioetan lehenengoa, baina beste 3 egingo dira.
Hurrengoa, azaroaren 7an egingo da, Hernaniko gazteen arteko harremanen inguruan hitz egiteko. Hirugarrena, azaroaren 21ean izango da, Gazte Politika baten giltzarri edo klabeak zein izan daitezkeen eztabaidatzeko. Azken saioa, berriz, abenduaren 5ean egingo da, kasu horretan, elkarlanerako espazioen inguruan hausnartzeko.
Bilerak irekiak dira eta herriko gazte guztiei parte hartzeko deia egin zaie, azken batean, gazteei zuzendutako partaidetza prozesua delako, beren beharrei erantzuteko.