Udazken eta neguko denboraldian sartu gara, eta Hernanin ez da aukerarik falta, moda-modako produktuak lortzeko. Horiek zein diren jakiteko aukera ederra izango da ostiral honetan, Atsegin-degin egingo den moda pasarelan, iluntzeko 20:00etan hasita. Hainbat sari ere zozketatuko dira, eta dantza erakustaldia izango da.
41 modelo, pasarela gainean
Moda pasarelan denboraldi honetan moda-modan egongo diren erropak, osagarriak, makillajea... zein diren ikusi ahal izango da. Erakustaldi hori egiteko, 41 modelo ariko dira lanean, gehienak, hernaniarrak. Batetik, umeen moda erakutsiko dute herriko 6 haurrek. Bestetik, 5 modelo profesional izango dira; 3 neska eta 2 mutil. Bestalde, Hernaniko 6 mutil ere ariko dira, eta gainontzekoak, neska eta emakume hernaniarrak izango dira, 50 urte bitartekoak.
300 euro zozketan, eta 5 euroko deskontuak denentzat
Moda pasarelara gerturatzen direnen artean 5 euroko deskontuak banatuko dira, pasarelan parte hartzen duten Hernaniko 17 komertzioetan gastatzeko. Azaroan erabili ahal izango dira, 40 eurotik gorako erosketetan. Bestalde, 300 euroko bale bat zozketatuko da.
Pasarelari bukaera festa giroan emateko, Shala dantza taldearen emanaldia izango da.