Edorta Poloren argazki bilduma izan da Argazki Rallyko onena. Sagar Uzta jaian, Argazki Rallya antolatu zuen Sagardoetxeak eta atzo banatu zituzten sariak. Bigarren bildumarik onena, Imanol Manterolarena izan da. Bertako produktuekin osatutako saski bana irabazi dute. Astigarragako baserrietako produktuak eta Sagardoetxeakoak daude.
HDR teknika
Poloren argazkiek zahar ikutua dutela esan daiteke. Berak azaldu zuenez, HDR teknika erabili ohi du: «Testura asko daude atzetik; asko gustatzen zait bizitasun hori ematea». Lehenengo aldia zen parte hartzen zuela. Bere esanetan, oso maila altua egon da: «Gainerakoen argazkiak asko gustatu zaizkit; ondo pentsatutako eta landutako argazkiak dira».
Sagardoetxeko arduradunek azaldu zuten, irabazleak aukeratzerakoan, kontuan hartu dutela bilduma osoaren uniformetasuna eta oreka. «Eta horrez gain, noski, festaren esentzia biltzea».
15 partehartzaile
Argazki Rallya zazpigarren urtez antolatu du Sagardoetxeak eta aurten, 15 lagunek hartu dute parte. Orain, partehartzaile guztien argazkiak erakusketan jarriko dituzte. Kultur etxean egongo dira ikusgai, azaroaren 2ra arte. Ordutegia: astebarruan, 09:00-13:30 eta 16:00-20:00; larunbatetan, 11:00-13:30 eta 16:00-19:30; eta igandetan, 11:00-13:30.