Bakailao Asteak saltsa jarri du herrian. Ekitaldiz betetako astea izaten ari da, eta jarraitzaile sutsuak badira dagoeneko. Eguerdi eta arratsaldetako poteoan, asko animatu dira tabernaz taberna, pintxo lehiaketako bakailu mokaduak probatzera.
Astea aurrera dijoa, eta azkeneko egunarekin kointziditu arazita, bihar antolatu dute festa nagusia. Eguerdira bitartean izango da saltsa.
Azoka eta ume jolasak, Atsegindegitik Urbietara
Bakailuarekin zerikusia duten produktuak erosteko aukera izango da bihar. Postuak Atsegindegi eta Urbieta bitartean jarriko dituzte, 10:00etatik 14:00etara. Ume jolasak ere tarte horretan izango dira; Urbieta kalean jarriko dituzte, eguraldi onak lagunduta.
Lehiaketa eta gehiago, Bakailao festan
Eta eguneko ekitaldi nagusia, aurreko guztia borobilduko duena, Bakailao Festa izango da.
Herritarrek bakailaoa pil-pilean egiteko duten trebetasuna erakusteko aukera izango dute, 11:00etatik 12:30etara. Bikoteka hartuko dute parte, eta gehienez, 25 bikote izango dira. Sukaldean aritzeko izango dituzte: bi kilo bakailu, mahaia, egurrezko ohola eta mantala. Gainerako osagaiak, sua, kazuela, etab. partehartzaileek eraman behar dituzte.
Epaimahaia izango da eta hiru sari banatuko dituzte; jakinarazi dutenez, irabazleek edo hauen ordezkariek bertan egon behar dute.
Baikailua dastatzeko aukera ere, izango da. Lizartza Selekzioa Makailaoak enpresak jarriko du. Pintxoak egingo dituzte txapelketan parte hartutako kideek eta herriko hainbat elkartek: Etxeberri, Gure Txoko, Sagastialde, Santa Barbara eta Xalapartak hain zuzen. Edana era izango da: Akarregi, Altzueta, Itxas-Buru, Iparragirre, Larre-Gain, Olaizola, Otsua Enea, Rufino eta Zelaiak jarriko dute sagardoa, eta ZERB 100% euskalduna den garagardoa ere izango da.