«Eskualdeko garapen ekonomikoaren arloan aurrerapauso haundia ekarriko duen proposamenarekin gatoz, gure udalerrien arteko lankidetzari esker, aro berri bat martxan jarri dezakeena» hitzekin egin zuen sarrera atzo, Luis Intxauspe alkateak. Buruntzaldeako Udaletako ordezkariekin batera aurkeztu zuen Eskualdeko Garapen Agentzia Integralaren proposamena. Sei Udalek osatzen dute Buruntzaldea, eta atzokoan Urnietako ordezkaria falta zen; sarreran esan zutenez «Mikel Pagolak ezin izan du etorri, nahiz eta dinamika honetan hasieratik egon den».
«Elkarlanean egindako bidearen ondorioa»
Azaldu zuten, proposamena azken urteetan elkarlanean egindako bidearen ondorioa dela: «2012an erein genuen aurreneko hazia. Helburua zen garapen ekonomikoa eta enplegua bultzatzea. Ordutik, proiektuak aurrera eta aurrera egin du. Bide horretan egin dira: eskualdeko enplegu plana prestatu, egoera sozioekonomikoaren diagnosia, ildo estrategikoak eta lehentasunak identifikatu eta hainbat mahai sektorial eratu. Azken hauetako parte izan dira gizarteratze eta laneratze arloko erakundeak, lanbide heziketa eta berrikuntzako zentroak, sindikatuak, langabetu elkarteak, enpresa haundi eta ertainak...»
Azpiegitura baten beharra
Orain arte egindako bidea Udaletako teknikarien arteko lanari esker izan dela azaldu zuten: «gestio lan guztietaz arduratu dira: Eusko Jaurlaritzaren eta Diputazioaren dirulaguntzak, udalek eskualdeko enpleguari zuzendutako 1.000.000 eurotik gorako ekarpena... Datu hauek erakusten dute azpiegitura baten beharra dagoela, orain arteko guztia gestionatzeaz gain, etorkizunera begira proiektu haundiagoak prestatu nahi baitira. Buruntzaldea eskualde bakarra da Gipuzkoan, halako azpiegiturarik ez duena. Esperientzia haundiko Garapen Agentziak daude Gipuzkoan, eta horiek eskaintzen dituzte, besteak beste, enpresen konpetibitatea bultzatzeko zerbitzuak, enplegu arloko lankidetzak...».
Pausu honetan sinetsi eta ekarpenak egin dituzten guztiei zorionak eman zizkieten, eta historikoki abagune paregabe baten aurrean gaudela azpimarratu zuten: «ereindako hazitik sagarrondoa jaio da. Hasi da lehen fruituak ematen, eta iritsi da sagardotegi propioa sortzeko garaia. Sagarrari ahalik eta zuku gehien atera behar diogu, anbizio haundiko proiektua gauzatzeko. Guztion artean sortutako sagardotegi propio hori izango da gaur gure eskualdeko udalerriek proposatzen dizuegun Garapen Agentzia».
Batzar eta Plenoetara
Proposamena Udaletara eramango dute datozen asteetan, «sostengua eman diezaioten».