Festa eguna dute gaurkoa, Portuko auzotarrek. Ekintzaz betetako egitarauarekin, Portu Eguna ospatuko dute. Bi elementu nagusi uztartuko dituzte, egun eder bat pasatzeko: jatekoa eta musika.
Haurrak izango dira aurrenekoak, janariaren bueltan elkartzen. Goizeko 10:30etan hasita, talo tailerra izango dute. Erakutsiko dute, beraiek ere sukaldari trebeak direla, eta talo horiek dastatzeko aukera izango da ondoren.
Patata tortilla txapelketa, auzotarren artean
Segidan, helduek jarriko dituzte mantalak, patata tortilla goxoenak prestatzeko. Bakoitzak bere etxean prestatuko du, eta 12:00etan entregatuko dituzte, txapelketarako. Bi sari izango dira: onenak, 2 lagunentzako bazkaria Fagollagan; eta bigarrenak, bazkaria sagardotegi batean, 2 lagunentzat. 13:00etan jakingo dute, zein diren irabazleak.
Kalejiran, auzo bazkarira
Trikitixaz lagunduta, kalejira egingo dute auzoan zehar, bazkarirako prestatzen. 14:30etan elkartuko dira mahaiaren inguruan, auzo bazkari eder batez gozatzeko. Txartelak aurrez erosi behar ziren, bertan bazkaltzeko.
Gorputza mugitzeko, erromeria
Bapo bazkaldu ondoren, gorputza mugitzeko aukera izango dute, dantzan. Erromeria egingo dute 18:00etan, Bide Batez taldearekin.
Eta egunari bukaera borobila emateko, gaztainak jateko aukera izango dute. Antolatzaileek auzotar guztiak animatu dituzte jaian parte hartzera.
PORTU EGUNA, gaur
10:30, Auzoko umeentzako talo tailerra, eta ondoren dastaketa.
12:00, Auzotarren arteko patata tortilla txapelketa (bakoitzak bere etxean egin behar du tortilla).
13:00, Tortilla txapelketako irabazleen sari banaketa.
13:30, Kalejira trikitixarekin auzoan.
18:00, Erromeria Bide Batez taldearekin.
20:30, Gaztain jatea.