Indartsu dator Bakailao Astea, bere 3garren edizioan. Egunero izango da zerekin gozatu, urriaren 13tik 19ra, bakailuaren bueltan: «urtetik urtera, indarra hartzen ari da Bakailao Astea. Herriko jatetxe, taberna, komertzio, elkarte gastronomiko... asko inplikatzen dira, gero eta eragile gehiago», azaldu du Luix Intxauspe alkateak.
Atzo aurkeztu zuten, Basque Culinary Centerren. Azaldu zuten, aurreko edizioetako balorazioa «oso positiboa» izan dela, eta eskerrak eman zizkieten parte hartzen duten eragile guztiei, «astea aurrera ateratzeko egiten duten lanagatik».
Bakailu pintxoak eta menuak, aste osoan zehar
Datorren astean, bakailua izango da protagonista, Hernaniko taberna eta jatetxeetan. Pintxo lehiaketa egingo dute tabernen artean: Guria, Aralar, Joxe Mari, Rioja, Kixkal, Gunea, Kitto, Tripontzi, Atxur, Oindi, Irrintzi, Txilibita, Goiz-Argi, Zumitza, Deportivo, Carrero eta Garin.
Astelehenetik ostiralera, pintxoak probatu ahal izango dituzte herritarrek, euro batean, ZerB euskal garagardoarekin. Beraiek baloratuko dituzte.
Jatetxeek, berriz, bakailu plater bat jarriko dute beraien menuan, astelehenetik igandera: Iturralde, Saretxo, Errioguarda eta Fagollaga.
Komertzioak, bakailuarekin bete-betean sartuta
Bakailao Astea presente egongo da herriko komertzioetan ere. Horren arabera apainduko dituzte eskaparateak, eta tonbola jarriko du Berriak elkarteak. Gainera, datorren astean zenbait saltokitan erosten duten herritarrak 2 kilo bakailuren zozketan sartuko dira.
Bakailu tailerra egingo dute Basque Culinary Centerren, astelehenean, eta bisita gidatua Albaola itsas kultura faktoriara, asteazkenean. Bietarako, aurrez eman behar zen izena. Ostiralean, berriz, kale animazioa izango da, 19:00etatik 21:00etara: Rockalean. Eta segidan, bakailu eta sagardo uztartze afaria izango da Iparragirre sagardo gunean. Asteazkena baino lehen apuntatu behar da, 27 euroan: 943 55 03 28 edo 943 33 73 70.
Bakailao Festa, igandean
Bakailao Festarekin borobilduko dute astea, igandean. Bakailua pil-pilean lehiaketa egingo da; asteazkenera arte eman daiteke izena, 943 33 70 28 telefonoan (goizez) edo gurutze-a@hernani.net. Gehienez 25 bikote egon daitezke. Doan da, eta antolakuntzak emango die bakailua; 2 kilo. Hiru sari banatuko dituzte: 300 euro eta bakailua; 200 euro eta bakailua; eta 100 euro eta bakailua.
Bitartean, bakailu produktuen Azoka Berezia eta haurrentzako jolasak egongo dira, Urbieta kalean, goiz osoan zehar.
ASTEKO SAIOAK
Urriak 13-17, Tabernen arteko pintxo lehiaketa.
Berriak elkartearen tonbola, herriko hainbat saltokitan.
Urriak 13-19, Bakailua jatetxeetako menuan.
Urriak 13, Bakailu tailerra, Basque Culinary Centerren, 17:30-20:00.
Urriak 15, Bisita gidatua Albaola itsas kultura faktoriara, 17:00.
Urriak 17, kale animazioa, Rockalean, 19:00-21:00.
Bakailu eta sagardo uztartze afaria, Iparragirre sagardotegian, 21:00.
Urriak 19, Azoka Berezia eta haur jolasak, Urbieta kalean, 10:00-14:00.
Bakailao Festa, 11:00. Bakailua pil-pilean lehiaketa, sari banaketa, pintxoak, sagardoa, garagardoa... Lehiaketako bakailua pintxotan emango da bukaeran.