«Trabaz jositako zirkuituetan lehiatzen gara: bide estuak, bihurgune itxiak, harriak, saltoak... Oso normala da karrera bakoitzean behin erortzea. Baina asko gozatzen dugu honekin». Aritz eta Xabi Urdanpilleta anaiak, BTT jaitsieretan lehiatzen dira. Alegia, lasterketa mendi puntan hasi, eta hiru-lau minututan jaisten dute, ahal duten azkarren.
Euskadiko Openean ari dira lehiatzen orain, eta bigarren daude biak, bakoitza bere kategorian: 23 urtez azpikoan Aritz (20 urte dauzka), eta juniorretan Xabi (18 urterekin). «Aurten oso ondo gabiltza», diote Ereñotzuko ziklistek, «eta ea helburuak lortzen ditugun».
Bi proba falta dira, eta irabaztea du helburu Aritzek: «aukera badaukat, baina aurrena dijoana oso indartsu dabil». Xabik, berriz, nahikoa dauka dagoen tokian geratuta: «mundu mailan lehiatzen da lehenengo dijoana, eta ez dago berarekin lehiatzerik». Hondarribian dute hurrengo saioa, larunbat honetan: «ondo ezagutzen dugu zirkuitua, eta irabaztera aterako gara». Azkeneko karrera, urriaren 26an izango dute, Galdakaon.
«Teknika asko behar da»
Ez da nolanahiko modalitatea, BTT jaitsierena: «teknika asko behar da, bizikleta kontrolatzeko. Baina baita fisikoa ere, potentzia haundia hanketan, 3 minutuko lanean dena eman behar delako. Eta burua lasai eduki behar da, oso kontzentratuta». Denbora gutxiko kontua da, baina zailtasunez betea: «oinezkoen bideetatik goaz bizikletan, oso estuak; askotan, oinezkoek ere lanak izango lituzkete hortik ibiltzeko». Saltoak, bihurguneak... Oso ohikoak dira erorikoak eta aberiak: «karrera edo entrenamendu bakoitzaren ondoren, bizikleta errebisatu eta txukun jarri behar dugu; eta aberiarik bada, konpontzen saiatu».
«Orain urte gutxi probatu, eta engantxatu egin ginen»
Andorran oporretan zeudela probatu zuten Urdanpilleta anaiek jaitsieren kontua, eta berehala engantxatu ziren: «oso espektakularra da ikusteko, eta adrenalina askatzen da jaitsieretan». Ez zuten askorik itxaron, bide horretatik jotzeko: «oporretatik bueltan, bizikleta erosi eta praktikatzen hasi ginen; eta hortik bi urtera, karreretan lehiatzen».
«Jaitsieran ezin da ezer inprobisatu, ikasi egin behar dira zirkuituak»
Karrera bakoitzean, bi jaitsiera egiten dituzte: «Euskadi mailan, bi manga dira, eta bietako denbora onenak kontatzen du; nazioartean, klasifikatoria eta finala dira». Hiru-lau minutuko bi saio dira horiek, baina askoz ere gehiago da karrera bat: «aurreko asteburuan joaten gara, zirkuitua ezagutzera. Buruz ikasi behar duzu, konfiantzaz joateko. Jaitsieretan ezin da ezer inprobisatu».
Euskal selekzioaren deia
Sasoi ederra daramate bi anaiek, eta merezitako saria jaso dute: «Euskadiko selekzioarekin egoteko aukera izan dugu, Estatuko txapelketan». Zorte askorik ez, ordea: entrenamenduetan hautsi zuen bizikleta Xabik, eta finalean erori zen Aritz. Bartzelonan, Vigon edo Huescan lehiatu dira, uda honetan. Hurrengo zita etzi, Hondarribian. Guadalupeko inguruetan, 15:00etan: «kuriosidadea daukana, etor dadila ikustera».