Hernaniko gazteriaren beharrak, nahiak eta ideiak ezagutzeko, parte hartze prozesu bat abiatuko du Udalak: Gaztetu Hernani! Helburua da, herriko gazteekin adostea, zein izan behar diren Udalak martxan jarri nahi duen Gazte Politikaren lan ildoak, eta elkarlanerako sortu beharreko espazioa definitzea.
Prozesu hau, Hernaniko Gazteriaren Diagnosia lanaren barnean dago kokatuta. Ikerketa hori, Udalak eta Aztikerrek egin zuten elkarlanean, eta proiektu orokorra izan zen. Fase berri honetan, gehiago zehaztu nahi dute diagnosi hori.
Aurkezpen saioa, ostiralean
Prozesuaren aurkezpena, ostiral honetan egingo dute, Biteri Plazan. 18:00etan hasiko da, eta 19:30etan bukatu. Bertan definituko dute, Hernanin gaztea izatea zer den. Udalak dei egin die gazte guztiei, hurbildu eta parte hartzeko. Izan ere, irekiak dira bilera guztiak.
Behin aurkeztuta, beste lau saio izango ditu partaidetza prozesuak, urrian hasi eta urte bukaera bitarte: urriak 24an, azaroak 7 eta 21ean, eta abenduaren 5ean. Lan saio bakoitzean, gai jakin bat jorratuko dute.
GAZTEEN PARTAIDETZA PROZESUA
Urriak 10, Aurkezpen saioa, Biteri Plazan, 18:00-19:30.
Urriak 24, Espazio publiko nahiz pribatuen erabilera.
Azaroak 7, Hernaniko gazteen arteko harremanak.
Azaroak 21, Gazte Politika baten giltzarriak.
Abenduak 5, Elkarlanerako espazioak.