Bitartean folk mmusika taldeak ireki du aurten Albokarien Hernaniko XXI. Topaketa. Jende ugari gerturatu zen Biterira ostegunean, hernaniarrek osatutako talde honen kontzertuarekin gozatzera. Bat baino gehiago harrituta gelditu zen gainera, fandangoaz gain, euskal kantutegiko abesti ezagunak edota Argentinako doinu melosoak txistuarekin eta albokarekin entzutean.
Gaur segida izango du topaketak; egun osoan zehar izango da aukera Euskal Herriko txoko guztietatik etorritako alboka hotsak entzuteko.
Goizean, kale-buelta
Alboka eta pandero joleek 11:30etan jarri dute elkartzeko zita, udaletxeko arkupeetan, eta 12:00etan abiatuko dira Kaxkoko kaleak alaitzera. 14:30etan, berriz, herri-bazkaria egingo dute Santa Barbara elkartean (partehartzaile ez direnek 20 euro ordaindu behar dituzte).
Emanaldia eta erakusketa, arratsaldean
Arratsaldeko 18:00etan Albokaldia deitu dioten emanaldia izango da Tilosetan. Herriko nahiz kanpotik etorritako alboka-joleek emango dute. Alboka egileen erakusketa ere izango da.