Udazkena bete-betean da. Tenperatura hasi da freskatzen, paisaiak kolore marroixka hartzen... Haizeak hegotik jotzen du egun askotan, eta zelai eta zuhaitz inguruak hasi dira hostoz betetzen. Natura lokartu egiten da udazkenean, negurako prestatu. Baserritarrentzat ere, urtaro berezia izaten da, uzta biltzeko garaia: babarrunak, artoak, intxaurrak, gaiztainak, sagarrak... udazkenean biltzen baitira.
Udazken «xuabea»
Negua bitartean egingo duen eguraldia jakin nahian, tenporetan dute fedea askok. Irailaren 17, 19 eta 20an izan ziren, eta horretan aditua den Peio Zabalak eman du Arantzazutik egindako prebisioaren berri. Udazken atsegina izango dela iragarri du, tipikoa. Gogoratu du, tenporek joera baten berri ematen dutela, eta ez informazio zehatza: «haizeak Hegotik jo du hiru egunetan, eta tarteka, hego mendebaletik ere bai. Tenperatura atsegina izango da beraz, udazkenean». Era berean, gogoratu nahi izan du, urriko tenperatura xuabea eta abendukoa, ez direla gauza bera. Izan ere, nahiz eta haizeak hegotik jo, urrian tenperatura 20ºCren bueltan ibiliko da; eta azaroak aurrera egin ahala, eta bereziki abenduan, freskoagoa izango da.
Haizea eta tenperatura epela izango dira protagonista udazkenean. Euria, nabarmenago, azaro erditik aurrera espero da.
Euri kontu askorik ez dela espero ere, esan du Peio Zabalak: «hego mendebaleak ekarriko ditu laino ilunak, baina ez dute euri askorik utziko. Beldurra ematen dit aurreko urteetan baino euri gutxiago izango ote den. Joera hori ikusten diot nik».
Ohi baino beroagoa, eguraldi agentzien arabera
AEMETek egindako prebisioaren arabera, tenperatura ohi baino epelagoa izango da udazkenean. Euriari dagokionean ordea, ez du aldaketa askorik iragarri. Balore normaletan ibiliko dela azaldu dute, urria lehorragoa, eta azaro erditik aurrera umelagoa. Tarteka haize bolada gogorrak izango direla ere azaldu dute.