Eva Esnaolak 30 ordu baino gutxiago behar izan zituen lehengo asteburuan, Espartatik Atenaserako 246km-ak egiteko. Estatuko aurreneko emakumea izan da proban parte hartzen, eta 3garren postua lortu du.
Espero zenuen horrelako emaitza ona lortzea?
Bai zera! Ni por el forro! Pentsa, bukatzeko gai izango ote nintzen ere ez nekien! Normalean aurreneko aldiz proba hau egiten dutenek ez dute bukatu ere egiten.
Nolako esperientzia izan da? Mendian eta gauez ibiltzeari beldurra zenion...
Oso gogorra. Ez nuen uste hainbesterainokoa izango zenik. Beldurra pasa dut, eta estresantea ere izan da, karreteran, bakarrik, kotxe edo kamioiak ondotik pasatzen zirela... Baina gaua eta mendiari dagokionez, uste baino hobeto! Zortea izan nuen: iazko irabazlearekin, Oliveirarekin joan nintzen, hark zapaltzen zuen tokian zapaltzen nuen. Berak esan zidan: lasai, nik eramango zaitut.
Eta ongietorria, espero zenuen?
Ze sorpresa! Eta ni, ze ignorantea! Ateraino eraman ninduen alabak. Ahizpak esan zidan atletismoko bulegora joateko, argazkiak ikustera, eta alabarekin joan nintzen. Iritsi arte ez nintzen konturatu! Egia esan, oso polita izan zen! Eskertzen dira horrelakoak. Pelotan ere, Irazustabarrena azpitxapeldun gelditu da Mexikoko mundialean! Hernaniko neskek beti ateratzen dugu zerbait! Ni ere hernaniar bezala ezagutzen naute, karreretara Hernaniko kamixetarekin joaten naizelako.
Helmugara iristea ere goxoa izan al zen?
Oso gutxi disfrutatu nuen. Patetikoa izan zen. Oker-oker eginda iritsi nintzen, atzeraka. Iruditzen zitzaidan zuzenduz gero, erori egingo nintzela. Oso nekatuta iritsi nintzen. Frontalarekin gaizki ibili nintzen; zuloei begira, asko nekatu nintzen. Ez dut sekula izan goizeko 07:00ak iristeko hainbesteko gogorik!
Errekuperazioa, gogorra?
Igandean bueltatu, eta lorik egin gabe ere, lanera bueltatu nintzen. Astelehena oso ondo pasa nuen, baina asteartean izugarrizko jakeka izan nuen. Bi egun pasa ditut horrela. Hankak, berriz, uste baino hobeto!
Eta orain, baduzu planik?
Oraingoz ez dut ezer buruan. Donostiako maratoira joango naiz, lasai, ondo pasatzeko. Baina ez besterik. Hau behin egin dut, eta nahikoa. Jarri diot ginda pastelari!
Esnaolak badu sponsorra
Pelotadendak Eva Esnaola zoriondu nahi izan du Spartathlonean lortutako emaitza ikaragarria dela-eta: «estatu mailan lehenengo emakumea da proba gogor hau egiten duena, eta nolako denborarekin! Ikaragarria!». Era berean, jakinarazi du Pelotadendak babestu duela Esnaola lasterketan, sponsor bezela. «Kronikak argitaratu zuen Eva Esnaolak sponsorra behar zuela; berarekin kontaktuan jarri eta korrikalaria sponsorizatzeko aukera izan dugu».