Egun osoko festa antolatu da urriaren 11rako, Atsegindegin, behar bereziak dituzten haurren elkartea, Pausoka, ezagutzera emateko eta elkarterako dirua biltzeko.
Elkartea, haunditzen
Atzoko aurkezpen ekitaldian laguntza eta babesa azaldu zieten Luis Intxauspe Hernaniko alkateak eta Glori Mendinueta Ongintzako arduradunak, Ezinduen eta Desgaitasunen bat dutenen Foru Aldundiko arduradun Txelo Perezek, Irrien Lagunek edota Laurobak, besteak beste.
Bestalde, Maria Lesakak, elkarteko gurasoetako batek, azaldu zuenez, «duela 2 urte sortu zen Pausoka, 12 gurasorekin, eta egun 50 familiari ematen diete babesa». Zentzu horretan, azaldu zuen «gizartea sentsibilizatu eta behar duten familiei babesa emateko, ateak zabalik» dituela Pausokak.
Emanaldiak, tailerrak eta paella-jatea
Egun osoko festa egingo da urriaren 11n. Kalejiraren ondoren, tailerrak izango dira Atsegindegin, 11:00etatik aurrera. 14:00etan, berriz, paella-jatea izango da (4 euro). Eta arratsaldeko 16:30etatik aurrera (5 euro): Berdiniren neskatillen ballet emanaldia, Porrotx eta Ane pirata, eta Laurobaren kontzertua. Txartelak bertan erosi ahal izango dira, edo Urnietako Eder liburudendan.