Errefusaren karakterizazioa edo azterketa egin du IDEMA enpresak, Udalak eskatuta. Datu horien arabera, hondakin birziklagarrien %90a, birziklatu egiten dute astigartarrek eta Udalak oso balorazio positiboa egin du: «Astigarragak beste behin, jarrera eredugarria duela erakutsi du gai honetan. Errefusarekin, organiko guztiaren %6, ontzi arinen %8, papera eta kartoiaren %6 eta beiraren %2 jasotzen dira soilik, beraz, astigartarrek hondakinetara botatzen dituzten hondakin berrerabilgarrien %90etik gora, zabortegira zuzenean ez bidaltzea lortzen da. Hau guztia, orain urte eta erdi atez ateko bilketa sistema jarri denetik». Udalaren helburua da datu hori hobetu eta pixkanaka %100era iristea.
Udalaren arabera, emaitzak oso onak badira ere, badaude hobetzeko puntuak: «Aztertutako komertzio eta ostalaritza establezimenduetako errefus laginetan, %21 organikoa atera zen. Horren arrazoiak aztertzen ari gara ostalariekin. Horrez gain, errefusa osatzen duten materialen artean, pardelak eta ehunak nagusitzen dira (%65 gutxi gorabehera). Frakzio hau errefusetik nola atera da orain erronka».
Udalaren web orrian, datuak ikusgai
Errefusaren karakterizazioa egiteko, martxoa eta apirilean zehar 14 lagin jaso dira herriguneko, komertzioetako eta larrialdi guneetako errefus bilketatik. IDEMAk prestatutako ondorioen txostena Udaleko web orrian dago ikusgai eta baita Kronikaren webgunean ere.
Udalak honakoa gaineratu du: «Atez ateko gaikako bilketa martxan jarri zenetik datuek behin eta berriz berretsi dute Astigarraga norabide onean doala hondakinen kudeaketan. Hilabetero ikusi daiteke gaikako bilketaren datua %80tik gora dagoela, eta gainera, 2014ko lehenengo sei hilabetekoan Astigarragak bere hondakinen %85 baino gehiago jaso ditu gaika».