Gaur ekingo dio denboraldiari Umore Ona taldeak, areto futbolean. Eta hasteko, etxean jokatuko dute. Ostiko taldea izanen dute aurrez aurre, arratsaldeko 19:00etatik aurrera. Herriko eskola publikoan jokatuko dute. Aurten ere, Gipuzkoako Ligan ariko dira goizuetarrak, hirugarren mailan.
Gehienak, gazteak
Mikel Perurena jokalaria da taldean geratu den beteranoetako bat. Gehienek taldea utzi dutela azaldu dio Kronikari eta orain gazteak direla nagusi taldean: «16-21 urte bitartekoak dira gehienak. Gero, 23, 25, 27 urtekoak gaude. Hobentxuenak joan dira eta kaxkarrenak geratu gara», dio umorean. Iazko moduan ibili nahiko lukete denboraldi honetan: «Erdialdean bukatu genuen eta aurten ere gustatuko litzaiguke. Disfrutatu eta ahal ditugunak irabazi. Hala ere, aurten gehiago kostako zaigula uste dut...».
Bizipoza herriari
Taldearen helburu bakarra, ongi pasa, izerdi pixka bat bota eta herriari bizipoza ematea dela azpimarratu du Perurenak: «Herrian ez da deus izaten bestela eta futbolaren aitzakian 100 bat lagun elkartzen dira. Guk ere aprobetxatzen dugu. Partidua kanpoan baldin badugu, kanpoan afaltzen dugu eta etxean denean, soziedadean. Ongi pasatzen dugu».
Entrenamenduak, astean bitan
Entrenamenduak astean bi egunetan egiten dituzte: astearte eta ostegunetan, 18:30etatik 20:00ak, 20:30ak aldera arte. «Askotan beranduago hasten gara, jendea ez baita puntual azaltzen. Noski, hasieran lasterka egiten dugu eta berandu etorriz gero, denbora gutxiago, lasterka egiteko!», azaldu du barrez.
Hamar, taldean
Denera, 10 dira taldean: 9 jokalari eta entrenatzailea. Ofizialki, Xabi Zugarramurdi bada ere entrenatzailea, zaharrenak aritzen direla zeregin horretan dio Perurenak: «Konpromisoa da azkenean eta denon artean egiten dugu».
2014-2015 denboraldia
Jokalariak: Mikel Zugarramurdi (porteroa), Mikel Perurena, Aimar Zugarramurdi, Oihan Zugarramurdi, Martin Etxeberria, Aitor Lujanbio, Ibai Zugarramurdi, Mikel Uizi eta Ander Apezetxea.
Entrenatzailea: Xabi Zugarramurdi.