Denboraldia ondo hasi duzue lehengo asteburuan Atletico SSi irabazita, ezta?
Halaxe da. Partidura 3 lesionaturekin azaldu ginen arren, maila ona erakutsi zuten mutilek. Baina oraindik hobetzeko asko dago. Ez zen partida erraza izan.
Zein dituzue aurtengo helburuak?
Nik ilusio handiz ekin diot denboraldiari. Talde luzea, gaztea, sasoikoa daukat, eta niretzat final fourren sartzea erronka polita litzateke. Baina, 3 lesionatu dauzkagu; Aitzol Arrietak, jolastekotan, azarotik aurrera egingo luke… Baldintza asko, eta maila honetan, edozein edozeini irabazteko gai da. Lehenengo zazpien artean geratzen saiatuko gara eta gero ikusiko dugu. Pausoz pauso.
Taldean aldaketak izan dira...
Ez asko, baina egitura aldaketa nabarmena izan da. Peru Dominguez izan da galera garrantzitsuena, bere sasoi onenean zegoelako eta ia pistako alde guztietan laguntzen zuelako. Julen Murillo eta Alberto Rodrigo ere kanpoan geratu dira. Etorri direnen artean, zalantzarik gabe, albiste onena Arrieta anaien itzulera izan da, baina Aitzolena ez dago erabat ziurtatuta. Haritzekin berriz, ez dugu jokalari bat irabazten, bost baizik, edozein postutan jokatu baitezake.
«Aurten taldea oso orekatua da. Posizio guztietarako jokalariak dauzkagu; batzuk 3 edo 4tan jolastu dezakete».
Juniorretik Joseba Pellejero urnietarra etorri zaigu, kalitate handiko jokalaria. Eta azkeneko urtetan entrenatu bai, baina jokatzen ez zuen jokalari bati aurten fitxa egin diogu; Ander Quijanori, alegia. Hau ere jenio bizikoa da. Peruren galerarekin Lander Gasparrek aurrerapausoa eman beharko du, Aitorrek ezingo baitu taldea berak bakarrik gidatu. Haritz eta Joseba Pellejeroren etorrerekin, berriz, iazko pibot eskasiaren ondorioz bere ohiko posizioetan jokatzen ez zuten zenbait jokalarik, aurten bere posiziotan jokatu ahal izango dute.
Aurten taldea oso orekatua da. Posizio guztietarako jokalariak dauzkagu, eta zenbait jokalarik 3 edo 4 posiziotan jolastu dezakete.
Eta entrenatzailea ere, berria; Ricardo Garreri hartu diozu testigua.
Ricardo aspaldidanik ezagutzen dut, talde berean jokatu izan dugu eta elkarren kontra ere bai; nik bera zuzendu izan dut ni bere taldeko entrenatzailea nintzela, eta alderantziz... 30 urteko amistadea. Niretzat maixua da, bera entrenatzen ikustean beti ikasten dut zerbait. Gomendioren bat eman dit, eta esker onez hartu dut.
Taldea ondo ezagutzen dut jokalari guztiak gure harrobitik atera direlako, eta zuzenki entrenatu ez ditudanak aldamenean entrenatzen ikusi ditudalako. Ez dakit zer mailan gauden; dakidana da, hobetzeko tarte haundia daukagula. Talde bizkorra da, garaia, giro oneko koadrila eta gaztea. Baina gaztetasun horrek eskarmentu falta eragiten du; hori da taldeko alderik ahulena.
Zein izango da erabiliko duzuen estrategia?
Astero lana, lana eta lana egin. Denboraldia amaitu arte inoiz ez erlajatu. Maila honetan hasieran talde guztiak gogotsu hasten dira, baina, gero, Eguberria dela, zubiak direla, negua dela… lasaitzen joaten dira. Guk ezin dugu horrelako dinamikan sartu.
Zein izango dira aurkari gogorrenak?
Hasiera batean denak izango dira gogorrak, denok 4 onenen artean sartzeko ilusio eta asmoa daukagulako. Gero, lehiaketa aurrera doan heinean, atzean geratzen direnak indarra galduko dute.
Eta zeinen aurka izango duzue aukera gehiago?
Hori ezin dizut ziurtatu, hara zer gertatu zitzaion Espainiako selekzioari Frantziakoarekin!
Gaur, DKSren aurka, zer espero duzue?
Partidu gogorra, pertsonal askotakoa, zikina, gu irabazteko haiei horrela komeni zaielako. Gu baino eskarmentu gehiago dute. Guk korri egin nahiko dugu, eta beraiek joko hori oztopatzen saiatuko dira. Bere jokatzeko era inposatzen duenak irabaziko du. Epaileek ere zeresana izango dute, joko zikin hori galazten badute…
Orokorrean, nola dago kluba?
Azken urteetan 2-3 belaunaldi on izan ditugu, eta horiei esker senior taldea oso ondo hornituta dago. Tamalez, urtero ezin ditugu Gipuzkoa edo Euskadi mailan talde lehiakorrak atera. Umeak erakartzeko futbolarekin, rugbyarekin, pelotarekin… lehiatu behar dugu. Ez da erraza. Hala ere, Hernanin entrenatzen hasi nintzenean neska talderik ez zegoen; orain bai.