Herritarrek erabakiko dute Udalak zertan inbertituko dituen 500.000 euro. Aurrekontu Partehartzaileen prozesua jarri zuen Udalak martxan udaberrian, helburu nagusi batekin: herritarrekin biltzea, hauen beharrak eta eskariak zeintzuk diren jakiteko.
Udaberrian bilera irekiak egin ziren, gaika, eta herritarrek eta zenbait eragilek proposamenak egiteko aukera izan zuten; email eta buzoi bidez ere, egin zituzten.
Bigarren fasea udan jarri zuen martxan Udalak: «proposamen guztiak aztertu eta baloratu dituzte udal teknikari eta politikoek».
Aurreneko saioa, bihar
Lan horiek eginda, hirugarren fasean da, Prozesu Partehartzailea. Iritsi da garaia Udalak aukeratutako proposamen horiek zeintzuk diren jakiteko. Hiru saio ireki antolatu dituzte, eta hauen helburua da lehentasunak zehaztea.
Aurreneko bilera bihar izango da, Biterin, 18:00etan. Aukeratutako proposamenak gaika bildu dituzte, eta biharkoan hauek landuko dituzte: kultura, euskera, jaiak, kirola, turismoa, ondarea, ekonomia...
Plaza Feministan izango da bigarren saioa, etzi. Berdintasuna, kultur-aniztasuna, hezkuntza, gazteak... eta beste hainbat gaien inguruko proposamenak izango dituzte aztergai, 18:00etan hasita.
Eta hirugarren eta azkeneko saioa datorren astelehenean egingo dute, hilak 29, Goiz Eguzkin, 18:00etan. Bertan landuko dira: hirigintza eta ingurumena, parkeak, aterpeak, komun publikoak, hirugarren adina, aniztasun funtzionala, behar sozialak...
Nola aukeratuko dira lehenetsitakoak?
Bileretan lehenetsi diren proposamen batzuk jasoko ditu Udalak 2015eko Udal Aurrekontuan. Eta nola aukeratu? Urrian zehar hainbat saio egingo dituzte auzoetan. Etxez etxe ere, banatuko da galdetegi bat. Eta interneten, www.hernani.com web orrian ere, jarriko dute galdetegia.
Azkenik, lehenetsi eta aukeratutako proposamen guztiak, aurrekontuetan sartuko direnak, ikusgai egongo dira azaroan zehar.
Partehartzea, ezinbestekoa
Izenak berak dioen moduan, herritarren partehartzea ezinbestekoa da eta Udalak biziki animatu nahi ditu saioetara gerturatzeko. Saio guztietan izango da haurtzaindegi zerbitzua.