Bikote sendoa osatzen dute Paul Ojuel eta Aitor Gorrotxategik, eta hala erakutsi zuten Lezon irabazitako finalean. Josetxo Etxandi txapelketan izan ziren nagusi, Urbieta II eta Telletxeari 22-18 irabazita. Euskal Federazion, zirkuito formatuan jokatzen da txapelketa, eta finalerdietatik hasi ziren pelotari hernaniarrak. Finala orekatua izan zen erdibidera arte. Gorrotxategik Telletxea baino seguruago jokatu zuen; Urbieta ordea, Ojuel baino gehiago ari zen asmatzen. Handik aurrera joko erritmoa bizitu zuen bikote hernaniarrak, eta 18-18 berdinduta egon baziren ere, txapelarekin itzuli ziren etxera.
Mikel Lasa eta Jagoba Garmendia hernaniarrek ere finala zuten asteburuan, Donostiako Euskal Jaien barruan. Alebin mailan aritu ziren eta finala Añorgako Albeniz eta Etxezarretaren kontra jokatu zuten. Aurkariak indartsuagoak ziren fisikoki, eta nagusi izan ziren.
Bloga, martxan
Bestalde, Hernaniko Esku Pelota ataleko bloga berriz ere martxan dagoela jakinarazi dute: hernanikoeskupilota. blogspot.com da helbidea.