Hamar urte beteko dira aurten, Hernani Wukrorekin GKEk elkartasun jardunaldiak antolatzen dituela. Ekintza ugari antolatu dituzte, guztiak irailaren 24tik 29ra. Atzo egin zuten aurkezpena, eta azaldu zutenez, aurtengo edizioa oso berezia izango da: «Angel Olaran dator, baina ez bakarrik. Wukroko 11 gaztetxo eta 3 monitore datoz berarekin». Atzo iritsi ziren Madrilera, eta bertan Kirol munduko sari bat jasoko dute. Bartzelonatik pasa eta asteazkenean iritsiko dira Hernanira. Estatuan barrena egingo duten ibilbidean, Wukrori laguntza ematen dioten herriak bisitatuko dituzte.
Ekintzez betetako astea
Datorren asteazkenean, hilaren 24an iritsiko dira Hernanira guztiak, eta Udalak egingo die harrera 18:00ak inguruan. Hurrengo egunean, ostegunean, hitzaldia emango du Angel Olaranek Biterin; 19:00etan izango da. Hernani Wukrorekin kirol eguna larunbatean izango da. Hainbat kirol proba egingo dituzte Antziolako pistetan, Wukro eta Hernaniko haur eta gazteen artean. Egun berean, arratsaldean, Ereñotzura gerturatuko dira, frontoi berrian palan jokatzera. Hilaren 28an, igandean, meza emango du Agustinetan Angel Olaranek. Eta eguerdian, elkartasun bazkaria egingo dute. Txartelak erosteko: Migel Lujanbio, Iruretagoiena eta ostegunetako feria; 22 euroan egongo dira. Azkenik, hilaren 29an, Hernani Institutuan pasako dute eguna Wukroko haur eta gazteek. Helburua izango da hemengo ikastetxeak ezagutu, klaseak nolakoak diren ikusi, gazteak ezagutu... Wukroko eta bertako gazteek elkarrekin pasako dute eguna.
Hernani Wukrorekin GKEk eskerrak eman nahi dizkie laguntza emango duten guztiei: Udala, Ereñotzu, CD Hernani, Institutua, herritarrak...