Urtero bezala, Mugikortasun Astea antolatu da Europa mailan. Aurtengo leloa: Gure kaleak hobetzea: hona gure aukera! Astigarragan ere, Mugikortasun Astea egingo da irailaren 16tik 22ra eta zenbait ekintza antolatu dituzte Udalaren Ingurugiro sailak, Astigarragako Herri Eskolak eta Astigarragako Txirrindulari taldeak.
Eskolan, egunero lantzen
Eskolan bertan hainbat ekintza egingo dituzte. Alde batetik, aste osoan zehar (irailaren 16-22) eskolarako sarbidea autoz itxita egongo da. Kotxeek herri sarrerako errotondatik gora egin ahal izango dute, baina Reollo altzariak dagoen eraikinari buelta emanda atera beharko dute. Bestetik, ostegunean, Seguru baietz Eusko Jaurlaritzaren sentsibilizazio kanpainak geldialdia egingo du Herri Eskolan. Horrez gain, Haur Hezkuntzako eta Lehen Hezkuntzako 1go mailako ikasleek eskolara joateko modu ezberdinak marraztuko dituzte eta gero, jolastokian erakusketa jarriko dute. Lehen Hezkuntzako 2, 3, 4, 5 eta 6garren mailako ikasleak, berriz, Astigarragako auzo ezberdinetatik eskolara oinez joango dira. Hala jakingo dute, ze distantziara dagoen auzo bakoitza eta zenbat denbora behar den eskolara heltzeko.
Herrian ere bai
Eskolatik kanpo ere izango dira ekintzak: ostegunean (18:30), Andoni Blazkez Astigarragako txirrindulari ohiarekin eta beste txirrindulari profesional batekin solasaldia izango da, Gazte Lokalean. Larunbatean, berriz, bizikleta martxa, ginkana eta hamaiketakoa egingo dira, Joseba Barandiaran plazan, 11:00etan. Eta astelehenean (irailak 22), bideo emanaldia: Bizikletan bidaiatu familiarekin: Gambia eta Senegal. 19:00etan Arrobitxuloko lokalean.