Dena prest dute Txantxangorri elkartean, Sagardo Txapelketaren edizio berrirako. Egun berezia izaten da izena ematen duten guztientzat, tradizioa diren bi girok bat egiten baitute gau horretan: sagardoak eta elkarte edo soziedadeko giroak. 31garren edizioa dute aurtengoa, eta ohi bezala, 15 sagardotegik hartuko dute parte: Barkaiztegi, Irigoyen, Rufino, Eula, Gaztañaga, Sarasola, Zelaia, Petritegi, Larre Gain, Bereziartua, Elorrabi, Lizeaga, Itsas Buru, Astiazaran eta Oyarbide.
Txapelketa datorren ostiralean jokatuko da, afari eder baten bueltan. Parte hartu nahi duten guztiek eman dezakete izena, bazkide direnek eta ez direnek; elkarteko bulegotik pasa behar dute, 19:00etatik 20:00etara.
Arrakasta, hasieratik
1984an egin zen aurreneko aldiz Sagardo Txapelketa Txantxangorri elkartean. Gipuzkoakoan inspiratuta-edo, hartu zuten erabakia, eta hala diote orduko kronikek: «oso arrakastatsua izan da herritar askok hartu dute parte, eta sagardoaren kalitatea bikaina izan da. Oyarbidekoa izan da ordea, onena».
14 sagardotegik hartu zuten parte aurreneko 4 edizioetan, eta handik aurrera 15 izatera pasa ziren. Berdinak izaten ziren hasiera batean, eta 2005 urtetik aurrera arauak zorroztea erabaki zuten antolatzaileek: «sagardogile batzuek ez zuten sagardorik onena ekartzen, eta erabaki zen sailkapenean azkeneko bi postuetan geratzen zirenak kanpoan uztea. Hala, txapelketan parte hartu nahi zuten sagardogile berriek aukera zuten».
Afaltzera gerturatzen diren herritarrek ematen dute botoa, eta kasu honetan ere, berrikuntzak izan dira: «Bodegako kide batek sekretuan zenbatzen zituen sagardo botilak eta sagardo bera ateratzen zen mahai guztietara. Arazoa zen azkeneko sagardoek puntuazio hobea jasotzen zutela. Gaur egun sagardoak txandaka ateratzen dira. Adibidez, aurreneko lau mahaietan sagardo bat, beste lauetan beste bat... Puntuazioa eta kontaketan ere eboluzionatu da. Egun dena informatizatua dago».
Menuan ere izan dira aldaketak. Gaur egungoa da: arrautza egosia, bakailua bi eratara, txekor kostilla, Urbasako gazta, kafea, kopa eta purua. Hasierako 15 urteetan ordea, ez zen arrautz egosirik eman, eta ezta ere bizkaitar erara egindako bakailurik ere.
10 sagardotegi, sarituak
Egin diren edizio guztietan aurreneko lauek jaso dute saria. Onenaren saria ordea, 10ek jaso dute. Horien artean badira bi, lehia estua dutenak: Rufinok 8 aldiz irabazi du eta Irigoyenek 6tan. Tartea gutxituko al da edizio berri honetan?
PALMARESA
Rufino Akarregi 8
Herrero Irigoyen 6
Altzueta 3
Barkaiztegi 2
Bereziartua-Jeronimo 2
Eula 3
Astarbe Mendiola 1
Otsua-Enea 1
Oyarbide 1
Petritegi 1
*Parte hartu eta noizbait aurreneko saria jaso duten sagardotegiak zerrendatu ditugu. Zenbakiak adierazten du zenbatetan jaso duten 1go saria.