Hirugarren urtez Ohorezko Mailan jokatuko du Hernanik. Bihar hasiko dute denboraldia, urteroko ilusio eta indar guztiarekin. Estreinaldirako goi mailako bisitaria izango dute gainera, Ohorezko Mailako izarretako bat: Unio Esportiva Santboiana. Etxean hasiko du denboraldia Hernanik; hitzordua 12:00etan, Landaren.
Katalanek, taldea mantendu
Llobregat bailarako taldearentzat denboraldi irregularra izan zen joan den urtekoa. Hasiera eskasa izan zuten, baina ligak aurrera egin ahala asko hobetu zuten jokoa. Bide horretan liga bukaerako talde onena izatera iritsi ziren. Eta aurten orduko bloke ia bera mantentzen dute.
Liga amaieran egindako fitxaketak asko hobetu zuen Santboianaren jokoa; Fagatapu Apikotoa joko zabaltzailea fitxatu zuten. Aldaketaren bat ere espero da: Oriol Garcia eta Marc Puigbert jokalariak baja izango dira. Baina Nil Baro jokalari haundia berreskuratu dute. Aurrean ere talde sendoa dute Katalanek. Phipps, Chichua, Sanz eta Tauli bezalako jokalariekin, hiru laurdeneko lerro dinamikoa osatzen dute. Arerio gogorra izango du beraz bihar, Hernanik.
«Landareko harmailak betetzea espero dugu»
Hernanik, bajak
Hernanik ere baja bat baino gehiago izango du aurten. Jokalari gazteek hartu dute erreleboa eta azaldu dutenez maila emateko prest dira.
Herritarrei gerturatzeko deia
Hernaniarren bultzada beti izaten da premiazkoa hirukoloreentzat. Bihar jokatuko den partidura gerturatzeko deia luzatu dute: «estropadak estropada, eguraldia lagun, espero dugu Landareko harmailak zaletuz bete eta hernaniarrak bultzatzea». Bestalde gogoratu dute bi pertsonentzako afari edo bazkaria zozketatuko dutela Ipintza sagardotegian; bazkide eta babesleen artean izango da zozketa.