Hainbat sukaldarik eta erakundeetako ordezkarik aurkeztu dute Koxk! festa eguna. Gastronomia eta elkartasun festa da Koxk!; larunbatean ospatuko da Donostiako Intxaurrondo auzoan, goizeko 10:00etatik 15:00etara bitartean. Asmoa da Etiopiako Wukro herria eta, orokorrean, Tigray eskualdea elikatzeko epe-luzerako proiektu bat bultzatzea.
Zaporeak da, hain zuzen, proiektu horren izena, eta Angel Olaran misiolari hernaniarrak Wukron bertan zuzentzen duen Saint Mary eskolan jarriko da martxan; asmoa da, besteak beste, Ostalaritza eta Gastronomia Eskola sortzea eta Saint Mary eskolako sukaldeak hobetzea.
Bazkarirako txartelak erosi daitezke aurretik, koxk.festa@gmail.com helbidera idatzita, eta egunean bertan jaso ahal izango dira.
Euskal produktuak eta munduko jakiak dastatzeko aukera, 4 gunetan
Proiektu horretarako dirua bilduko da Koxk! festarekin. Donostiako Intxaurrondo auzoan ospatuko da etzi, 10:00etatik 15:00etara. Kilometro eta erdiko ibilbide bat osatu da, eta lau gune jarriko dira bertan.
Ibilbideak Zubiaurreko zubian izango du sarrera. Handik Villa Yeyettera joango da. Segidan, Txaparrene parkera jaitsi eta Parada kaletik sartuta, Parada plazara iritsiko da. Handik Mirakruz aldapa jaitsi, Intxaurrondo kalera sartu eta Intxaurrondo Zaharrera joko du. Gero, Larrotxene Kultur Etxearen parkinera jarraituko du; segidan Intxaurrondo kalera; gero Zulo Zahar elkarteara, eta azkenean, Txaparrene pasealekura.
Bertan lau gune jarriko dira. Txaparrene parkekoa Luis Irizar gunea izango da. Bertan egingo dira Idiazabal Gaztaren Juan Mari Arzak Saria eta patata-tortilla lehiaketa herrikoia, bazkaria eta kantu-jira.
Villa Yeyetteko Pedro Arregi gunean, berriz, eusko labeleko txerri eta txahal pintxoak izango dira.
Intxaurrondo kaleko Juan Mari Arzak gunean euskal sukaldaritza ezagutu ahal izango da Arzak eta Adurizekin, eta umeen gunea ere bertan izango da; aukera izango dute eskulanak egiteko, murala margotzeko, Porrotxekin egoteko, gazta egiteko...
Azken gunea Gilda gunea izango da, Intxaurrondo Zaharrean. Pintxoaren Kilometroa egingo da bertan, besteak beste. Iluntzean, berriz, Intxaurrondo Zaharreko festekin egingo du bat egitarauak, eta denetik izango da: herri-kirolak, apar-festa, txokolatada, berbena...
Kilometro eta erdiko ibilbidean zehar lau gune egongo dira; tartean, umeena. Eta ibilbidean zehar kale animazioa izango da.
Animazioa, ibilbide osoan
Gune batetik bestera joandakoan ere ez da aspertzeko tarterik izango. Izan ere kale-animazioa bide osoan zehar egongo da: trikitilariak, Gaztelumendi bertsolariak, txaranga, kantu-jira, hankapaloak...
Bestalde, postuak izango dira baserriko produktuekin; eusko labelekoekin; txakolina, ardoa eta sagardoarekin; Palestinako jakiekin... Hauek erosteko tiketak hartu beharko dira, euro baten trukean.
Bazkaritarako txartelak aurretik erosteko aukera
Eguneko ekitaldi fuerteenetakoa bazkaria izango da, Luis Irizar Gunean egingo dena.
400 pertsonentzako izango da tokia, eta txartelak 10 euro balio du. Aurretik erosi daitezke, nahi izanez gero. Horretarako, koxk.festa@gmail.com helbidera idatzi behar da, izen-abizenak eta erosi nahi den txartel kopurua zehaztuz. Txartelak egunean bertan jaso ahal izango dira.