Dagoeneko Mexikon dago Irazustabarrena hernaniarra gaurtik hilaren 21era arte jokatuko den Munduko Pelota Txapelketan aritzeko, Estatuko Selekzioarekin. Bertan jokatuko dute, baita ere, Nagore Arozena lizartzarrak, Maider Mendizabal anoetarrak eta Maite Ruiz de Larramendi nafarrak.
Txapelketa gaur hasi bada ere, hernaniarrak bihar jokatuko du lehenengo partidua. 30 metroko frontoian ariko da, paleta goma argentinarreko modalitatean.
Irazustabarrenak gutxienez 3 partidu jokatuko ditu ligaxkan, Frantzia, Mexiko eta Argentinaren kontra.
Hiru arerio gogor
Irazustabarrenak 3 partidu jokatuko ditu ligaxkan, aurrera segi aurretik, eta lehenengo partidua bihar jokatuko du, Frantziaren kontra.
Hurrengoa, igandean izango da, Mexikoren aurka. Eta azkenik, Argentina izango du arerio, hilaren 16an. A multzoan ariko dira lau selekzioak, eta hiruk egingo dute aurrera.
XVII. Mundu Txapelketa
Aurtengoa Euskal Pelotako Munduko Txapelketaren 17garren edizioa da, eta Mexikon, Zinacantepec-en jokatzen da.
Pelota modalitate guztiak izango dira bertan: eskuz, zesta puntan, palan... Eta herrialde asko: Kuba, AEB, Txile, Brasil, Frantzia, Peru...