Porrotx eta Marimotots, Luis Intxauspe alkatea eta Glori Mendinueta Ongintzako zinegotzia, Lauroba musika taldea, Amagoia Etxeberria diseinatzailea, Iban Estevez boxeolaria, Urnietako UDA alderdia... Horiek eta beste asko busti ziren atzo Hernaniko Pausoka elkartearen alde.
Behar bereziak dituzten haurren gurasoek osatzen dute Pausoka elkartea, eta Etxeberri auzoan dute egoitza. Hainbat zerbitzu eskaintzen dituzte bertan, behar horiek dituzten umeentzako: fisioterapia, terapia okupazionala, logopedia...
Hain zuzen, elkarteari laguntzeko jarri dute martxan Busti zaitez Pausokaren alde kanpaina.
Urriaren 11n Pausoka Eguna antolatuko dute Hernanin.
Kolaboratzeko moduak
Atzo beren burua busti eta beste bati erronka pasa ziotenak dagoeneko badira Pausoka elkartearen kolaboratzaile; laguntza ekonomikoa emanez edo boluntario lanak eginez lagundu daiteke elkartea.
Hemendik aurrera kanpaina zabaltzea espero dute. Horretarako, erronka jaso ez dutenak ere animatzea espero dute. Nork bere burua grabatu dezake, eta bideoa bidali pausokaelkartea@gmail.com helbidera, edo zuzenean facebook edo twitter sare sozialetan jarri, Pausoka aipatuz.
Pausoka eguna, urriaren 11n
Kanpaina honen beste helburu bat da kolaboratzaileak lortzea eta oihartzuna ematea urriaren 11n Hernanin ospatuko den Pausoka Egunerako.
Egun osoko egitaraua prestatu dute: txaranga; tailerrak; bazkaria; musika, dantza eta Pirritx, Porrotx eta Marimotots pailazoen emanaldia...