Ikasturte berriari atzo eman zioten hasiera Hernanin haur eta gaztetxoek. Gehientxuenak perezarekin, baina kideak ikusteko gogoz itzuli ziren klaseetara.
Ikastetxe bakoitzaren arabera egutegia zertxobait aldatzen bada ere, hil honetan zehar, orokorrean, goizetan bakarrik izango dituzte klaseak.
3.000 ikasle
Guztira, ia 3.000 ikasle matrikulatu dira Hernanin, zero eta 18 urte bitartekoak.
Hain zuzen, zero eta bi urte arteko 104 umek hasi dute ikasturtea. Haur hezkuntzan, berriz, 754 ume hasi dira; lehenengo hezkuntzan, 1.117; bigarren hezkuntzan, 639; eta batxilergoa edo erdi nahiz goi mailako zikloak ikasten, 379.