Asteburuan Miranda de Ebroko Antonio Vadillo zirkuituan izan da Iker Lujanbio hernaniarra, carcross kategorian parte hartzen.
Irabazteko aukerak bazituen, denboraldi bikaina egin baitu, baina azkenean, sailkapen nagusian bosgarren egin du. Marc Battle kataluniarra izan zen irabazlea, 89 punturekin.
Finalera, 6garren denbora onenarekin
Zirkuitua larunbatean ireki zen. Bertan jokatu zen lehenengo manga, eta hernaniarrak laugarren denbora onena egin zuen, 45 pilotoren artean. Bigarren mangan, berriz, bigarren postua lortu zuen. Horrela, bi emaitzak batuta, seigarren denbora onenarekin sartu zen finalean.
Igandean jokatu zen finala, eta seigarren egin zuen Lujanbiok. Beraz, Estatuko Autokross Txapelketa sailkapen nagusian bosgarren postuari eustea lortu du, denboraldiari bukaera ederra emanez.
Denboraldi berria, martxoan
Asteburukoa izan da denboraldiko azken lasterketa. Aldaketarik ez badago, behintzat, martxoan hasiko da denboraldi berria, Alcañi-zeko Motorland zirkuituan.